سوچ؟؟

ڈرائنگ روم کا دروازہ کھلا تھا۔ طاہرہ گیلری میں کھڑی تھی۔ یہاں ان ڈور پلانٹ دیواروں کے ساتھ سجے تھے۔ فرش پر ایرانی قالین کے ٹکڑے تھے۔ دیوار پر آرائشی آئینہ نصب تھا۔ لمحہ بھر کو اس آئینے میں طاہرہ نے جھانک کر دیکھا۔ اپنے بال درست کیے اور کھلے دروازے سے ڈرائنگ روم میں نظر ڈالی۔

ابھی ڈنر شروع نہ ہوا تھا اور مہمان کچھ کھڑے کچھ بیٹھے قسم قسم کا ڈرائی فروٹ اور چپس کھاتے آپس میں باتیں کر رہے تھے۔ اخباروں کے رسیا سیاسی پیش بندیاں کر رہے تھے۔ کچھ اہل دل صاحب کرامت بنے معاشرے کے عبرت ناک انجام کی پیش گوئیوں میں مصروف تھے۔ بوڑھے، بوڑھیاں ماضی کی یاد میں مگن Nostalgia کا شکار متلائے ہوئے انداز میں موجود عبوری دور کے نقائص بیان کرنے میں ساری قوت لگا رہے تھے۔ خوش وقتی کے طالب اٹکل سے کبھی ادھر کبھی ادھر ہونے والے گفتگو میں موج میلہ منانے میں مشغول تھے۔ مہمان باتوں میں ایک دوسرے کو بہلا رہے تھے، رگید رہے تھے، شیشے میں اتار کر ہم خیال بنانے کے شغل میں مصروف تھے۔ طاہرہ اس مجلس دوستاں کو چھوڑ کر گیلری میں آگے نکل گئی۔

یہ ڈنر مسرت بھابھی اور سعید بھائی نے اپنی شادی کی سالگرہ منانے کے لیے دے رکھا تھا۔نہ جانے کیوں طاہرہ ڈرائنگ روم سے آگے دادی اماں کے بیڈ روم کی طرف چلی گئی۔ اس نے یہاں رہ کر کئی باتیں سیکھی تھیں۔ اچاری گوشت پکانا، دو پٹوں کی ٹائی اینڈ ڈائی کرنا اور گھر میں داخل ہوتے ہی بزرگوں کو سلام کرنے جانا… آخری عادت بیس پچیس سال شہر میں رہ کر کمزور پڑ گئی تھی لیکن اس کے سندھی پلاؤ اور اچاری گوشت کی ابھی تک دھوم مچی تھی۔

پچھلے چھ ماہ سے اسے ایک احساس جرم کھائے جا رہا تھا۔ وہ جب بھی سعید بھائی کے گھر آتی کبھی دادی اماں کو ملنے کی تکلیف گوارا نہ کرتی۔ لیکن اس رات بیڈ روم کے دروازے پر ہلکی سی دستک دے کر جواب کا انتظار کیے بغیر وہ اندر چلی گئی۔

دادی اماں کڑھائی کیا ہوا سفید ڈو پٹہ اوڑھے خالی ذہن صوفے پر بیٹھی تھی۔

’’کون ھے…؟‘‘ آدھی سوئی آدھی جاگی، آدھی مری آدھی زندہ دادی نے اپنی گول آنکھیں پھرا کر پوچھا۔’’کون ہے بھئی…؟‘‘

’’میں دادی میں…‘‘ اسی ’’میں‘‘ نے پچھلے چھ ماہ سے دادی کا چہرہ بھی نہ دیکھا تھا۔

’’بھائی میں کون…؟‘‘ دادی اپنے ماتھے پر ہاتھ رکھ کر اسے پہچاننے کے مرحلے میں تھی۔

’’دادی جی… میں… طاہرہ… مسرت کی دوست‘‘

’’و علیکم السلام، لیکن مسرت کون ہے…؟ ایک اور سوال دادی نے ہوا میں پھینکا۔

’’آپ کی بہو، دادی جی… سعید بھائی آپ کے بیٹے کی بیوی… مسرت‘‘

’’اچھا… کون سی بہو…؟‘‘ سوال دادی اماں کا پیچھا سارا دن نہ چھوڑتے۔ ان ہی سوالوں کی مدد سے وہ اپنی گڈمڈ دنیا میں ایک ربط قائم کرنا چاہتی تھی۔

’’چھوڑیں دادی ماں، ایک ہی تو بہو ہے آپ کی…‘‘

دادی ماں شرمندہ سی ہوگئیں سر جھٹک کر بولیں ’’ہاں تو اچھا… بیٹھو… تم طاہرہ ہونا … میں پہلے ہی پہچان گئی تھی۔‘‘

’’جی بالکل…‘‘

دادی پرسکون ہوگئیں ان کی عمر سمجھنے کی تھی نہ سمجھانے کی۔ پل بھر پہلے کی بات بھی یاد نہ رہتی۔ لیکن عجیب بات ہے کہ جوانی کے کچھ واقعات ازبر تھے۔ ان کی تفصیلات کو وہ کبھی نہ بھولتیں اور بار بار ان کو دوہرانے پر بھی رتی بھر فرق ان کے بیان میں نہ آتا۔

طاہرہ دل میں شرمندہ سی ہونے لگی… یہ کیسی مصروفیات ہیں کہ ہمیں اپنے بنیادی فرائض بھی بھولتے جا رہے ہیں… یہ کیسے ہوا کہ وہ ہر دوسرے تیسرے دن مسرت کے گھر آتی رہی اور دادی ماں کا اسے خیال تک نہ آیا۔

’’آپ کو مبارک ہو دادی جان…‘‘ طاہرہ نے احساس جرم تلے کہا…

’’کیسی مبارک…؟‘‘ دادی نے پوچھا۔

اسی وقت مریم ٹرے اٹھائے کمرے میں داخل ہوئی۔

’’کون ہے…؟‘‘

’’میں دادی ماں… اینی ورسری کاکیک لائی ہوں…‘‘ مریم نے کہا۔

’’کیک…؟ وہ کیوں…؟‘‘ بھولی بھالی دادی ماں نے پوچھا۔

’’بس جی آپ کیک کھائیں… کیوں کیسے کے بکھیڑے میں نہ پڑیں… بڑا سوفٹ چاکلیٹ کیک ہے دادی، چبانا نہیں پڑے گا…‘‘

مریم نے ٹرے تپائی پر رکھ دی۔ یوں لگتا تھا جیسے وہ کسی حکم کے تحت آئی ہے، اپنی خوشی سے کیک نہیں لائی۔ دروازے میں رک کر مریم بولی… ’’آنٹی طاہرہ پلیز آپ اندر آجائیں… امی آپ کا انتظار کر رہی ہیں…‘‘

مریم دادی کو دیکھے بغیر چلی گئی… تیس برس کی یہ لڑکی بڑی تندرست، پر اعتماد اور صاحب رائے تھی۔ وہ اپنی کیک زندگی دوفیز میں بانٹ چکی تھی۔ کچھ عرصہ وہ آئس کریم، کوک، برگر، چائنیز کھانے، ملائی ملی سلادیں، چیز اور مرغن دعوتی کھانے کھاتی۔ اس کی جلد چمکدار، نچلا حصہ گھوڑے کی طرح مضبوط، ہاتھ پاؤں میں لچک اور چال میں کتھک ناچنے والی کی سی پھرتی آجاتی۔ ان دنوں میں وہ مائیکل اینجلو کا ماڈل لگتی۔ صحت کے اشتہار بنے ابھی کچھ ہی دن گزرتے تو اسے انچی ٹیپ اور وزن کرنے والی مشین یاد آجاتی۔ اس کی سہیلیاں، ملنے والیاں بھی جلد ہی یاد دلا دیتیں کہ کمر پر ٹائر بڑھ رہے ہیں اور وہ ماڈل گرل سے زیادہ مڈل کلاس کی گرہستن نظر آتی ہے۔ اب مریم ڈائٹنگ پر اتر آتی۔ صرف جوس پر اکتفا کرتی۔ کبھی کسی سلیمنگ پارلر سے کھانے کا پرنٹڈ پروگرام خرید لاتی۔ خوب ورزش سے بدن تھکاتی۔ وزن گھٹانے کا ہر طریقہ استعمال کرتی۔ ایسے ہی جنونی عہد میں اس نے ورزش کے لیے ایک ورزشی سائیکل بھی خرید لی تھی۔ اپنے جسم پر غیر معمولی جور و ستم کرنے کی وجہ سے وہ اینو رکسیا کی مریض نظر آتی… آنکھیں اندر دھنس جاتیں، رنگ سنولا جاتا۔ اٹھنے بیٹھنے میں چستی نہ رہتی۔ سر میں درد ٹھہر جاتا اور سب سے بڑی بات ایسے دنوں میں جب وہ ڈائٹنگ کے فیز میں ہوتی تو اسے بہت غصہ آتا۔

وہ سلیولر فون کی ایک کمپنی میں مار کیٹنگ اسسٹنٹ تھی۔ ڈائٹنگ کے دنوں میں اس کا جھگڑا مارکیٹنگ منیجر، باقی اسٹاف خاص کر فون آپریٹر اور لفٹ میں سے ضرور ہوتا۔ ان دنوں میں اس کی سیلز بھی کم ہوجاتی اور اسی وجہ سے اس کی کارکردگی کو ہیڈ آفس کے نوٹس میں لایا جاتا۔ ان دنوں میں اسے سب سے زیادہ غصہ اپنی جان پر آتا جو پچھلے دس بارہ سال کی کوشش کے باوجود اس کے لیے ایک معقول رشتہ بھی تلاش کرنے سے معذور رہی تھی۔ ایسے ماں باپ کا کیا فائدہ جو اسے بیٹوں کی طرح پیروں پر کھڑا کرنے میں تو کامیاب ہوگئے لیکن زندگی کے لمبے سفر کے لیے سہارا مہیا نہ کرسکے۔

’’یہ کون تھی…؟‘‘ دادی نے کیک کو غور سے دیکھ کر پوچھا۔

’’مریم… دادی جی‘‘

’’مریم…؟ وہ کون ہے؟‘‘

دادی کی عمر سمجھنے سمجھانے کی نہ تھی۔

’’یہ… یہ کیوں چلی گئی فوراً…؟‘‘

’’دادی جی… آپ کی پوتی اتنی تندرست و تونا ہے، اتنی انرجی ہے اس میں کہ وہ کسی جگہ زیادہ دیر ٹک کر بیٹھ نہیں سکتی۔ اس کا اندر اسے گھمائے پھرتا ہے۔‘‘

آج کل مریم تندرستی کے فیز میں تھی!

’’جب میں اس کی عمر کی تھی تو اس کا باپ سات برس کا تھا۔ اس کی ماں کو کچھ فکر نہیں۔ بیٹی دھرتی دہلائے پھرتی ہے۔ یا تو کھانے کو کم دے… ہماری اماں ہمیں کبھی انڈہ کھانے کو نہیں دیتی تھیں اور یہ پورا چکن روسٹ کھاتی ہے سالم… کہیں باندھ دے اسے طاہرہ … صبح کار ساتھ لے جاتی ہے، نہ جانے کہاں کہاں پھرتی ہے ماری ماری…‘‘

بھبھول رنگت دادی کے پاس طاہرہ بیٹھ گئی۔ آج اسے اس مرن مٹی پر پیار آرہا تھا۔ بوڑھی دادی کے ہاتھ کی نسیں انگلیوں سے بھی نمایاں تھیں۔ طاہرہ نے دادی کا ہاتھ پکڑ کر سوچا… کبھی اس دادی کو دیکھنے کے لیے کسی کی آنکھیں ترستی ہوں گی۔ دادی بھی دلہن بنی ہوں گی۔ ان کے ہاتھوں پر بھی مہندی کے گل بوٹے ابھرے ہوں گے۔ اس نے بھی شرما لجا کر کسی کو اپنی محبت کا تعویذ بنایا ہوگا… حسن … عشق… غیرت… شہرت نہ جانے کیا کیا وقت کی لہروں پر بہہ گیا جس محبت کا چرچا بکھیڑا، اشانتی جانی ہڑپ کر جاتی ہے وہ محبت بڑھاپے میں کہاں جاتی ہے؟… کیا محبت اس درجہ جسم کی مرہون منت ہے؟… وہ بھی نوجوان جسم بلکہ نوجوان خوب صورت جسم کی!

انسان کی ساری خوبیاں بڑھاپے میں کہاں جاتی ہیں… کہاں اور کیوں…؟

’’تم ہی ذرا میرے بہو بیٹے کو سمجھاؤ… بیٹی بھی مشین کی طرح ہے، بہت جلد پرانی ہوجاتی ہے… ابھی تو مریم پر آنکھ ٹکتی ہے، پھر پھسلے گی… سن طاہرہ! تیرا ملنا ملانا بہت ہے… تیرا میاں وہ…‘‘ وہ پھر گم ہوگئیں۔

’’ڈاکٹر ہے جی…‘‘

’’لو میں کوئی بھولی ہوں فضل کو… میرا بلڈ پریشر چیک کرنے آتا ہے۔ بہت لوگ آتے ہیں اس کی کلینک پر… کوئی بر تلاش کرو تم دونوں مریم کے لیے… میری بہو تو اوت ہے اوت…‘‘

شادی بیاہ کی بات ہو یا سسرالی رشتے داروں کی غیبت… دادی ماں کی سوچ فوراً سیدھی ہوجاتی۔ پھر نہ کوئی تفصیل بھولتی نہ یاد داشت اڑنگے لگاتی۔ اچانک دادی اماں نے کچھ اس ڈھب سے فلسفیانہ انداز میں مربوط گفتگو کی کہ طاہرہ بھی مریم کی فکر میں گھلنے لگی۔

گولڈن اینی ورسری کا فنکشن رات ساڑھے بارہ بجے ختم ہوا۔ اس کے بعد بھی چند مہمان سیاسی صورت حال کو باہم ڈسکس کرتے رہے۔ عورتوں میں غیبت کا سیشن شروع ہوا۔ بڑی باریک بینی کے ساتھ اپنی ہم جنس کو باہم تکا بوٹی کرتے ہوئے وہ بہت خوشی محسوس کر رہی تھیں… کسی مرد پر کوئی عورت حرف نہ دھر رہی تھی۔ آخر مہمانوں کو وداع کرنے جب سعید بھائی اور مسرت باہر کاروں تک آئے اور آخری جوڑا طاہرہ اور ڈاکٹر فضل کا رہ گیا تو طاہرہ نے موقع غنیمت جان کر پوچھا… ’’مسرت! بھلا مریم کی کیا عمر ہے…؟‘‘

مسرت نے کان کھجلا کر کہا… ’’اس جون میں تیس کی ہوجائے گی…‘‘

ڈاکٹر فضل ابھی ڈرائیور سیٹ پر بیٹھے تھے۔ گاڑی بند کر کے باہر آگئے۔ اب یہ چاروں گاڑی کے ارد گرد کھڑے مریم کے متعلق باتیں کرنے لگے۔

’’بھئی کچھ بیٹی کے متعلق بھی سوچو کہ یہ اپنی اینی ورسر ریاں ہی منانے میں مگن رہوگے…‘‘ ڈاکٹر فضل نے کچھ مذاق کچھ سنجیدگی سے کہا۔

سعید بھائی کھسیانی ہنسی ہنس کر بولے… ’’لو ہم نہیں سوچتے بھلا۔ ہم نے تو اتنا سوچا، اتنا سوچا کہ اسے اپنے پیروں پر کھڑا کر دیا۔ مرد کی طرح کماتی ہے، کسی کی محتاج نہیں… سوچ رہی ہے باہر جاکر پی ایچ ڈی کر آئے…‘‘

’’اور شادی… سعید بھائی، وہ کون کرے گا…؟‘‘ طاہرہ نے سوال کیا۔

’’تم تو الٹا ہمیں چور سا بنا رہی ہو طاہرہ… اس کو تو کوئی پسند نہیں آتا… اوپر سے نوکری کرلی ہے، ہنسنے بولنے کو وہاںہم عمر مل جاتے ہیں جواب پر… اگر بن گائے پالے دودھ ملے تو یہ بتاؤ گائے کیوںپالے مریم، کس لیے؟

کسی قسم کی Dependency تو رہی نہیں مرد پر، پھر شادی کیوں کرے؟ مرد عورت کا رابطہ ہو، ماں بچے کا رشتہ ہو، دوستی ہو… بھائی جہاں کسی کی محتاج ہی نہ ہو، وہاں جھنجھٹ ہی کیوں مول لے کوئی؟…‘‘ مسرت بولے گئی۔ یوں لگتا تھا وہ اندر ہی اندر اپنی کوشش سے تھک چکی تھی۔

’’اچھا بھائی آپ لوگ مجھے بتائیں کیسا لڑکا پسند کرے گی ہماری مریم…؟‘‘

’’ایک تو وہ کہتی ہے کہ لڑکادیکھنے میں ٹھیک ٹھاک ہو۔ امریکن ایکٹر جیسا نہ سہی پر لوگ باگ اس کے قد، رنگ اور شکل پر پھبتیاں نہ کسیں۔‘‘

’’سنا تو یہی ہے کہ مرد کی شکل نہیں، اس کی کمائی دیکھی جاتی ہے لیکن خیر … اکیسویں صدی کا ورلڈ آرڈر یہی ہو گا… اور؟…‘‘

اب سعید بھائی کھنگارے اور دبی آواز میں بولے… ’’دوسرا بھئی کھاتا پیتا ہو۔ شادی کے بعد وہ سارے سکھ مریم کو مل سکیں جو اس کے بوڑھے ماں باپ نے رکھے ہیں۔ وہ کسی کنگلے کے ساتھ زندگی کی جدوجہد میں شامل ہونا نہیں چاہتی۔ وہ جن کمفرٹس کی عادی ہے، وہ اسے ملنے چاہئیں۔‘‘

’’رائٹ…‘‘ طاہرہ نے سمجھنے کے انداز میں کہا… ’’میں سمجھ گئی۔ لڑکا سیلف میڈ نہ ہو، یہی مطلب ہے نا… نہ سلیف میڈ ہونے کے خواب دیکھے… بنا بنا یا ہو۔‘‘

’’سمجھو نا طاہرہ… ٹھیک کہتی ہے مریم… بھلا تیس چالیس برس مریم نے مرد کو بنانے میں گزارے تو اس نے کیا انجوائے کیا…‘‘ محبت سے ڈاکٹر فضل نے کہا۔

طاہرہ نے تعجب سے ڈاکٹر صاحب پر نظر ڈالی۔ جب ڈاکٹر صاحب سے اس کی شادی ہوئی تھی تب فضل معمولی ہاؤس جاب کر رہا تھا۔ وہ کیمبل پور کے ڈپٹی کمشنر کی بیٹی تھی، پر ماں نے بڑی محبت سے سمجھایا تھا کہ ڈاکٹر دین کا پابند اور شرافت کا پاسدار ہے… رزق کا اللہ مالک ہے وہ ہر جگہ بہم پہنچائے گا۔ پہلی پوسٹنگ کو ٹری جنکشن سے آگے ایک قصبے میں ہوئی۔ یہاں کوئی سوشل لائف تھی نہ جگمگاتے بازار اور گلیاں۔ طاہرہ کو ڈاکٹر فضل کے ساتھ وقت گزارنے کا کنواں بھر پانی میسر آیا جس میں ڈول ڈال ڈال کر وہ اپنی تنہائیاں سیراب کرتی رہی۔ فضل کے والدین نفیس آدمی تھے۔ نہ تو انہوں نے طاہرہ کی زندگی میں زہر گھولا، نہ ہی طاہرہ نے کبھی کیمبل پور کی زندگی کو یاد کر کے آنسو بہائے۔ اتنی فراغت، تنہائی، غریبی کے ہوتے ہوئے وہ ساتھ رہنے کو زندگی کی سب سے بڑی خوشی سمجھتے رہے۔ شاید طاہرہ پرانے خیالات کی تھی یا ممکن ہے فضل کے ساتھ وقت ہی ایسے گزرا کہ وہ سمجھنے لگی ساتھی کو کھلا کپڑا ہونا چاہیے… اس کی کتر بیونت… سجاوٹ، ناپ سب کچھ اپنے دوسرے ساتھی پر چھوڑنا چاہیے۔

اچھا جی اور کچھ؟… ’’طاہرہ بولی۔

’’ہاں بھئی ہاں… یاد آیا۔ اس کا Exposure ضرور ہو۔ کنویں کا مینڈک نہ ہو، اپنے ہی گن گانے والا… بلکہ اگر ہوسکے تو انٹر نیشنل لیول کا Exposureہو۔ بھلا ایسے آدمی کا بھی کیا فائدہ جو کر اس کلچر نہ جانتا ہو۔ چھوٹی کھوپڑی والے سے کیا لینا…!‘‘ سعید بھائی بولے۔

طاہرہ نے کہنا چاہا کہ زیادہ Exposureبھی کبھی کبھی خطرناک ہوسکتا ہے لیکن طاہرہ کو علم تھا کہ سعید بھائی بڑے باتونی تھے۔ ان کے پاس ڈسکوری، اکونومسٹ، نیوز ویک، ٹائم، ایشیا ویک، جیوگرافیکل میگزین اور ایسے ہی کئی رسالے مروجہ علوم اور انفارمیشن سے بھرے آتے تھے۔ وہ کئی ملکوں کی سیاحت بھی حکومتی خرچ پر کرچکے تھے۔ ایک وقت تھا جب وہ پرائم منسٹر کی تقریر بھی لکھتے تھے اور سیاسی حالات پر ان کی بصیرت ثقہ بند تھی… لیکن یہ سارا لکھنا پڑھنا، انفارمیشن سے پر دماغ وہ اس لیے تر و تازہ رکھتے کہ انہیں بولنے کا شوق تھا۔ وہ پینٹاگن سے لے کر سی آئی اے تک اور کلوننگ سے لے کر پانچ ہزار سال پرانے مردے پر ریسرچ تک پر گفتگو کر کے محفل کو ہراساں اور حیرت زدہ کرنے کا فن جانتے تھے۔

مریم بھی سعید بھائی کی طرح بری پڑھا کو تھی۔ اس کے پڑھنے لکھنے کے پیچھے بھی یہی تحریک تھی۔ وہ بھی ہم چشموں کو اپنی انفارمیشن سے وِن کرنا چاہتی تھی۔ مردم بیزار مریم لوگوں کو پسند کرنے میں خاصی دقت محسوس کرتی۔ کوئی لڑکی اس کے معیار پر پوری نہ اترتی… کیوں کہ لڑکیاں عام طور پر فیشن، بازار، بیوٹی پارلر، گھر کی آرائش، چغلی غیبت سے آگے گفتگو روانی سے چلانا نہ جانتی تھیں۔ اردو میڈیم کی پڑھی ہوئی لڑکیاں خاص طور پر اس کے پیمانے پر پوری نہ اترتیں۔ خراب انگریزی لب و لہجے رکھنے والیاں اسے جھلاہٹ میں مبتلا کر دیتیں۔

کچھ عرصہ پہلے کی بات ہے کہ ایک پرانی سہیلی سے مریم بازار میں ملی۔ اس وقت مریم بڑے اسٹائل سے ملک شیک پی رہی تھی۔

ایک سیاہ کار زناٹے سے گزری۔ پھر کچھ آگے بڑھ کر کار رکی اور پوری اسپیڈ سے Reverseمیں لوٹی۔ مریم تھوڑا سا گھبرا گئی۔ اخباروں میں دہشت گردی کے واقعات پڑھتے پڑھتے اس کا دھیان اب خیر کی طرف کم ہی منعطف ہوتا تھا۔ کار اس سے تھوڑی ہی دور جاکر رکی۔ ایک نوجوان عورت اس میں سے برآمد ہوئی… سیاہ لباس، سیاہ چشمہ، سیاہ سوئٹر، چہرہ بلیچ شدہ، بالوں میں Streaks، چہرے پر میک اپ ماسک کی طرح چپڑا ہوا… مریم کی سہیلی کسی بیوٹی کلینک کا ماڈل نظر آرہی تھی۔

آصفہ نے بھاگ کر ملک شیک پیتی مریم کو بانہوں میں لے لیا۔ پھر اسے گھما پھرا کر دیکھا۔ محبت سے دایاں گال چوما اور بڑے جذبے سے انگریزی میں بولی… ’’بھائی مریم کہاں ہوتی ہو تم… میں نے تو کئی دوستوں سے پوچھا، کسی کے پاس سے نہ تمہارا فون نمبر ملا نہ ایڈریس۔ اولڈ گرلز کے فنکشن میں بھی تم نہیں آئیں۔ کمال ہے… تم تو مکمل طور پر بلیک آؤٹ ہوگئیں سنگ دل!‘‘

’’میں تو یہیں تھی… میرا تو مستقل ایڈریس بھی وہی ہے جو کالج میں تھا۔‘‘

آصفہ نے ابرو اٹھا کر تعجب سے کہا… ’’یہ کالج والے بھی عجیب آدمی ہیں۔ ایک اولڈ اسٹوڈنٹ کا پتہ نہیں کرسکے۔ پھر آصفہ نے کار میں اچھل کود کرتے اپنے بچوں کو ڈانٹ پلائی…‘‘ دو منٹ تم لوگ آرام سے نہیں بیٹھ سکتے۔ کیا قیامت آگئی، چپ چاپ بیٹھو ورنہ پٹائی ہوگی…‘‘ بچوں پر برس کر وہ تازہ مسکراہٹ لیے مریم کی طرف متوجہ ہوئی…‘‘ یار اس کارٹون چینل نے تو بچوں کی سائیکلوجی ہی بدل دی ہے… لیونارڈو آرام سے بیٹھو… ماما آرہی ہے…‘‘

پتہ نہیں بچے تین تھے کہ چار لیکن سارے ہی تھوڑی دیر کے لیے دبک گئے۔

’’تمہارے کتنے بچے ہیں مریم…؟‘‘ آصفہ کی جانب سے سوال آیا۔ جب بھی یہ سوال مریم سے پوچھا جاتا، وہ عجیب طرح کی خفت محسوس کرتی گویا وہ جسمانی طور پر کسی قسم کی نااہلیت میں مبتلا تھی۔

چند لمحے توقف کے بعد مریم بولی…‘‘ میرے بچے…؟ میری تو ابھی شادی بھی نہیں ہوئی…‘‘

’’تحت تحت تحت… بھئی جلدی کر، زیادہ دیر نہ ہوجائے۔ یہ بے حیا مرد لوگ بھی نوجوان بلو نگڑیاں پسند کرتے ہیں… تم سوچ کیا رہی ہو آخر…؟‘‘

مریم کچھ ہل سی گئی…‘‘ سوچ کچھ نہیں رہی، میرے مطلب کا آدمی ابھی ملا نہیں… ایویں کیویں کے ساتھ زندگی خراب ہوگی…‘‘

آصفہ نے چلا کر اپنی اچھلتی کودتی فوج کو دبکا مارا… ’’نوٹنڈو بہت مار پٹے گی گھر چل کر، آرام سے بیٹھو سب …‘‘ پھر وہ مریم کو تنقید بھری نظروں سے دیکھ کر بولی… ’’ہم دونوں کی سالگرہ ایک ہی دن آیا کرتی تھی۔ یاد ہے نا کیفے ٹیریا میں سالگرہ منایا کرتے تھے… تھرٹی کی تو ہوگئیں، ہم دونوں اب… سوچ کیا رہی ہو مس پڑھاکو…‘‘

’’سیلیولر فون کی ایک کمپنی میں کام کرتی ہوں۔ مجھے اچھی تنخواہ ملتی ہے…‘ جھینپ کر مریم نے اپنی وجہ عزت بیان کی۔

آصفہ نے نچلا ہونٹ دانتوں میں دبایا۔ پھر موضوع بدل دیا۔ تھوڑی دیر وہ پرانی سہیلیوں، کالج کی پروفیسروں اور سیاسی حالات کی باتیں کرتی رہیں۔ اتنی دیر میں بچوں نے ہارن بجانا شروع کر دیا۔ بھس میں شادی کی چنگاری ڈال کر اللہ حافظ کہتی ملین ڈائر کی مسکراہٹ بکھیرتی آصفہ اپنے سپرمین، مائیکل اینجلو، نوٹنڈو، بیٹ مین لے کر رخصت ہوگئی۔

بہت سارے وعدوں کے باوجود دونوں پھر ایک دوسرے کو مل نہ پائیں۔ موجودہ عہد کی زندگی نے جہاں اور بہت ساری چیزوں کو ختم کر دیا تھا، وہاں یہ ذاتی فراغت کی موت کا باعث بھی ہوئی تھی۔ کھاتے پیتے گھرانوں میں بینک، مارکیٹ، سوشل فنکشن، فیشن اور سیاحت کے لیے تو وقت تھا لیکن کتاب پڑھنے اور میل جول کے لیے وقت نہ چھوڑا تھا۔ بچے بوڑھے بری طرح متاثر ہو رہے تھے۔ مصروفیت ہی اس قدر تھی کہ معاشرے کو کانوں کان خبر نہ ہوئی اور وہ بدل بدلا کر رہ گیا۔ آصفہ سے ملاقات کے بعد مریم سنجیدگی سے سوچنے لگی کہ کہیں اب واقعی دیر نہ ہوگئی ہو۔ آصفہ کے بچے دیکھ کر اس کے دل میں ایک ہوک سی اٹھی۔

اب تک جتنے امیدوار وہ مسترد کرچکی تھی، سب کو سنی سنائی پر Rejectکیا تھا، کبھی کسی سے ملاقات نہ کی تھی اس قدر ضرور ہوا کہ مریم بر دکھوے کی رسم پر مان گئی اور پہلی بار مسرت نے سکھ کا سانس لیا کہ کم از کم مریم نے اتنی ہامی تو بھری کہ ٹرولی دھکیلتی اندر ڈرائنگ روم میں آجائے گی۔ ساری عمر تو وہ اسے چیپ حرکت سمجھتی رہی۔ اب خود بر دکھوے میں شامل ہوکر جواب دے گی۔ فوراً مسرت نے فون ملایا اور حلیہ نویس طاہرہ سے تفصیل کے ساتھ مریم کی پسند اور ناپسند کی اطلاع دی۔

ڈاکٹر فضل بھی اب تک مریم کے معاملات کی لپیٹ میں آچکے تھے۔ مریضوں کو اب وہ ایک اور نظر سے دیکھتے پرکھتے اور پھر گھر پر طاہرہ کو انفارم کرتے۔ یہ دونوں بڑے دو اور دو چار قسم کے پریکٹیکل لوگ تھے لیکن ذرا سے چھوٹے واقعے نے انہیں گویا مریم کا گاڈ فادر اور گاڈ مدر بنا دیا۔

ان ہی دنوں ایک شائستہ سے بزرگ طاہرہ سے کلینک پر ملے۔ یونس صاحب دس سال ہوئے سول سروس سے ریٹائر ہوکر کئی بیماریوں کی سنگت میں ریٹائرڈ زندگی گزار رہے تھے۔ باریش، سرخ و سفید، درواز قد پیر مرد ڈاکٹر صاحب کے کلینک پر آتے۔ تمام مریض بھگت جانے کے بعد ڈاکٹر صاحب سے ملاقات کرتے۔ انہیں بلڈ پریشر اور شوگر کی تکلیف تو تھی ہی لیکن اس کے علاوہ جوڑوں کا درد، گلے کی شکایت، قبض، اسہال، نیند کی کمی، نیند کی زیادتی، گیس ایسی کئی علتیں بھی ساتھ تھیں جن کی وجہ سے عام طور پر انہیں ڈاکٹرفضل کے پاس آنا پڑتا۔

’’یہ میری بیوی ہے سر طاہرہ…‘‘

’’سلام علیکم سلام علیکم‘‘ یونس صاحب بولے۔

’’آپ تو غالباً سب سے بعد میں دکھائیں گے؟‘‘ ڈاکٹر صاحب نے سوال کیا۔

’’جی جی…‘‘ بوڑھا یونس کلینک کو غالباً کلب کے طور پر بھی استعمال کرتا تھا۔

’’تو آپ اور طاہرہ وہاں صوفے پر بیٹھیں، میں کافی بھجواتا ہوں…‘‘

طاہرہ اور یونس صاحب لمبے صوفے پر بیٹھ کر باتیں کرنے لگے۔ جلد ہی طاہرہ کو احساس ہوا کہ یونس صاحب کی زبان بات کرنے کو ترسی ہوئی ہے۔

’’میں یہاں قریب ہی رہتا ہوں۔ وائف پچھلے سال فوت ہوگئیں۔ اب شدید تنہائی ہے… بارہ کینال کی کوٹھی کے غسل خانے ریلوے اسٹیشن کے غسل خانوں سے مشابہ ہیں۔ کسی کا شاور چلتا ہے تو رکتا نہیں… ڈبلیو سی ایسے رستے ہیں کہ ٹائلز میں اورنج رنگ کا زنگ لگ گیا ہے… ٹائلیں چکٹ… پردے گرا چاہتے ہیں… قالینوں پر چلو تو مٹی دھب اٹھتی ہے۔ جب گھر والی نہ رہے تو گھر کہاںرہتا ہے۔‘‘

’’بچے وچے… یعنی کوئی بہو وغیرہ…؟‘‘ کافی کا چھوٹا سا گھونٹ پی کر طاہرہ نے سوال کیا، لیکن بن سنے یونس صاحب بولتے چلے گئے…‘‘ دو مالی رکھے ہیں۔ آپ کسی دن ڈاکٹر صاحب کو لے کر آئیں۔ سارا گھر جھاڑ جھنکار بن چکا ہے۔ ہمارے ابا شکاری تھے۔ گیلری، ڈرائنگ روم، کھانے کے کمرے میں حنوط شدہ شیر، چیتے، ہڑیال ٹنگے ہیں۔ کہیں دیواروں پر، کہیں سیڑھیوں پر یوں لگتا ہے ہم جانوروں کے میوزیم میں آگئے ہیں…‘‘

’’تو آپ انہیں اٹھوا کر کسی علیحدہ کمرہ میں رکھوا دیجئے…‘‘

جھریوں بھرے بڈھے نے سفید ہاتھوں کو مل کر جواب دیا… ’’اب ہم ٹھہرے پرانے آدمی۔ اتنی آسانی سے ماضی کے ساتھ رشتے بھی نہیں توڑ سکتے۔ جہاں ابا ان جانوروں کو لٹکا گئے ہیں، وہیں بھلا لگتا ہے… اگر اٹھوا دیے تو ہم ہی بے وفائی کریں گے ابا کے ساتھ…‘‘

’’کوئی بیٹی… بہو…؟‘‘ طاہرہ نے پھر پوچھا۔

لیکن وہ اپنی روانی میں بولتے گئے۔۔۔ ’’رات کے وقت باہر نکلیں کمرے سے تو لگتا ہے جانور زندہ ہوگئے ہیں۔ کوٹھی کے خالی کمزروں میں بھاگے پھرتے ہیں حنوط شدہ۔‘‘

’’لیکن… آپ کسی کو ساتھ رکھئے نا… یہ تو بری بات ہے۔‘‘ اب طاہرہ، یونس صاحب پر بھی ویسا ہی ترس کھانے لگی جیسا اسے مریم پر آتا تھا۔

’’میں نے شکاگو خط لکھ دیا ہے اپنے بیٹے کو… وہ ڈاکٹر ہے وہاں… اکلوتا ہے بڑا سعادت مند… سب کام وام چھوڑ کر آرہا ہے۔ اس کے آنے پر سب ٹھیک ہوجائے گا…‘‘

طاہرہ کو اس بوڑھے کی رجائیت پر ترس آگیا… اگر ڈاکٹر واپس بھی آجائے تو اس بات کی کیا گارنٹی کہ سب ٹھیک ہوجائے گا۔

آواز گرا کر یونس صاحب بولے… ’’کسی کسی رات کو لگتا ہے کہ جانوروں میں جان پڑ گئی ہے اور وہ خالی کمروں میں دندناتے پھرتے ہیں… اچانک ریچھ کی ڈفلی بجنے لگتی ہے… شیر گرجتا ہے… چیتوں کی چاپ سنائی دیتی ہے… عجیب قسم کا خوف آتا ہے…‘‘

طاہرہ کو یونس صاحب کی حالت پر رحم آنے لگا!

کافی کی پیالی تپائی پر رکھ کر یونس صاحب آہستہ سے بولے… ’’میرا خیال ہے کہ بیٹی کے پاس چلا جاؤں، وہ بڑے اصرار سے بلاتی ہے… لیکن گھر جوائی کی کیا عزت ہوتی ہے بھلا گھر سسرے کس باغ کی مولی…‘‘

پیر مرد نے اپنے اوپر ہنسنا چاہا لیکن اس کا منہ لٹک سا گیا۔ یونس صاحب کو کسی سے بات کیے ایک مدت ہوچکی تھی۔ اسی لیے وہ سرپٹ زبان سے اپنی تنہائیوں کی داستان بغیر کوما، فل اسٹاپ کے سنانا چاہتے تھے۔

’’کیا آپ کا بیٹا یہاں ایڈجسٹ ہوجائے گا…؟‘‘

یونس صاحب نے مسکرا کر کہا… ’’پہلے مشکل یہ تھی کہ وہ شادی پر رضامند نہیں تھا۔ اب مان گیا ہے۔ اس کی بیوی اسے اپنے وطن میں ایڈجسٹ کرائے گی…‘‘

طاہرہ کے دل کی گھنٹی بجی… پالیا… پالیا… اس نے اندر ہی اندر ارشمیدس کی طرح نعرہ لگایا… شکاگو کا ڈاکٹر… ہڈیوں کے علاج کا ماہر… بارہ کینال کی کوٹھی … نہ کوئی ساس نہ نندیں… اکیلا ایک سسر، وہ بھی چند روزہ… آزادی ہی آزادی… راج ہی راج… تمہاری تو گرینڈ پر کس لاٹری نکل آئی مریم۔

ڈاکٹر معظم کے آنے سے پہلے طاہرہ اور مسرت کی لمبی ملا قاتیں اور فون پر اور بھی لمبی باتیںہوئیں… سعید بھائی اور ڈاکٹر فضل بھی پہلے کی نسبت ایک دوسرے سے زیادہ گرم جوشی سے ملنے لگے۔ وہ سب ایک طرح کے یوفوریا میں مبتلا تھے حتی کہ دادی اماں بھی اپنی سہاگ رات، شادی کا جوڑا، سسرالی رشتے داروں کو بار بار زیادہ یاد کر رہی تھیں۔ ویسے تو لگتا تھا کہ الزائمر کی مریضہ تھیں اور پل بھر پہلے کی بات یاد نہیں رکھ سکتیں لیکن ان دنوں وہ پرانے ڈھولک گیت سنا کر سب کو حیران کردیتیں۔

شام ڈھل رہی تھی جب ڈاکٹر معظم اپنے بوڑھے باپ کا ہاتھ تھامے اندر آیا اور سعید بھائی کے پاس خاموشی سے بیٹھ گیا۔ درواز قد، پراعتماد، گورا چٹا، وجیہہ، دھیمی آواز میں بولنے والا شلوار قمیص پہنے ہوئے تھا۔ تھوڑی دیر بعد جب مریم ٹرولی دھکیلتی اندر آئی تو اس نے بھرپور نگاہوں سے ڈاکٹر معظم کو دیکھا لیکن ڈاکٹر نے لمحہ بھر کو بھی نگاہیں اٹھا کر مریم کی جانب نہ دیکھا۔ ڈاکٹر فضل سے وہ بڑے تحمل کے ساتھ کسی مریض کی کیس ہسٹری ڈسکس کرتا رہا۔ مریم کو اگر ڈاکٹر نے دیکھ لیا تھا تو وہ محض اتفاقاً تھا۔ گھر لوٹنے سے پہلے یونس صاحب نے طاہرہ کو اپنی رضامندی سے بھی مطلع کردیا۔

رات گئے سعید بھائی کا فون آیا۔ نیم سوئی نیم جاگی طاہرہ اس کال کے لیے تیار نہ تھی۔ پہلے اسے خیال آیا کہ کوئی رانگ نمبر ہے۔ سعید بھائی کی آواز سن کر اس نے اندازہ لگایا کہ غالباً وہ لڑکے والوں کی رائے معلوم کرنا چاہتے ہیں۔

دوسری جانب سے سعید بھائی کی آواز آئی… ’’ہم لوگ بڑے شرمندہ ہیں طاہرہ بہن… بلکہ مسرت تو مارے شرم کے فون بھی نہیں کر پائیں… ہمیں افسوس ہے کہ … ہم یہ شادی نہیں کر پائیں گے…‘‘

’’لیکن کیوں سعید بھائی… آخر وجہ؟‘‘

سعید بھائی کی آواز آئی… ’’دیکھئے ڈاکٹر معظم کا بھی کوئی خاص قصور نہیں ہے۔ ملک سے باہر جاکر کچھ لوگوں پر ردعمل ہو جاتا ہے۔ اپنی شناخت قائم کرنے کے لیے وہ مذہب پرست ہوجاتے ہیں۔ اپنی پہچان قائم رکھنے کو وہ ضرورت سے زیادہ Rigidہوجاتے ہیں۔ لیجئے جو شخص امریکہ میں رہ کر زکوٰۃ دیتا ہے… بینک کا سود نہیں لیتا… عورتوں سے آشنائی نہیں رکھتا… وہ تو پکا فنڈامنت لسٹ ہوا ناں…‘‘

طاہرہ ذرا سی چڑ گئی… ’’کمال ہے سعید بھائی، غیر مسلم جو مرضی کہیں، آپ تو ڈاکٹر معظم کو کچھ نہ کہیں جی اس کی تو دنیا بھی سنور گئی اور آخرت بھی…‘‘

سعید بھائی کی آواز میں کچھ کھردرا پن آگیا… ’’اب اس جوانی میں داڑھی رکھے بیٹھا ہے تو بیوی کو بھی تو حجاب پہنچائے گا نا… ہم اس سے کیا امید رکھ سکتے ہیں۔‘‘

طاہرہ کو دھچکا لگا… ’’اس قدر خوب صورت، باپ پرست… شائستہ آدمی پھر کب ملے گا؟‘‘

’’بات یہ ہے طاہرہ بہن… سب کچھ ٹھیک ہے۔ ہمیں معظم پسند بھی آیا ہے لیکن اس نے ساری شام نظریں نیچی رکھیں۔ مریم کی جانب غور سے دیکھا تک نہیںـ۔ اب جو خود شرع کا اس حد تک پابند ہو، وہ بیوی سے بہت زیادہ توقعات رکھے گا۔ ہم نے مریم کو اتنی تعلیم اس لیے تو نہیں دلوائی کہ وہ اکیسویں صدی میں اپنی نانی دادی کی زندگی گزارے۔‘‘

’’آپ کی ساری باتیں مجھے بڑی فروعی لگ رہی ہیں سعید بھائی… میں واقعی آپ کی بات سمجھی نہیں…‘‘

تھوڑی دیر فون پر خاموشی رہی، پھر سعید گلا کھنکار کر بولے… ’’طاہرہ ہمارا یہ خیال ہے یعنی مسرت، مریم اور میرا… کہ مذہب کے پیروکار عام طورپر بڑے تنگ نظر ہوتے ہیں۔ ایسے لوگوں کے ساتھ اول تو رہنا بہت مشکل ہوتا ہے۔ شخصی آزادی قدم قدم پر مجروح ہوتی ہے۔ پھر میرا خیال ہے کہ جو شخص مذہب کے فریم ورک میں رہتا ہے، وہ نہ تو اچھا انسان ہوتا ہے نہ شوہر… ہم ڈاکٹر معظم کی دل آزاری کرنا نہیں چاہتے۔ آپ مہربانی فرما کر انہیں طریقے سے انکار کردیں۔ بس ان کی دل آزاری بھی نہ ہو… اور انکار بھی ہوجائے، اس کے ابا کو میں خود سمجھا لوں گا… میرے نزدیک دل آزاری سب سے بڑا گناہ ہے۔ ڈاکٹر معظم جیسے لوگ نہ تو خود آزاد ہوتے ہیں نہ کسی اور کو آزادی دے سکتے ہیں۔ یہ خواہشات کو پورا کرنے کے بجائے انہیں دبانے کے درپے رہتے ہیں۔ ہم اپنی بیٹی کی شادی اس لیے کرنا چاہتے ہیں کہ وہ خوش رہے۔ گرفتارِ مذہب کا ساتھی بنا کر اسے آزمائشوں میں نہیں ڈالنا چاہتے۔ انسان اپنی خواہشیں بھی پوری نہ کرے تو وہ یہاں آیا کیوں ہے…؟‘‘

دوسری طرف فون بند ہوگیا۔

صبح تک طاہرہ کروٹیں بدل کر سوچتی رہی کہ یونس صاحب کو کیا کہہ کر انکار کرے… وہ بچارے تو مریم کو دیکھ کر سمجھنے لگے تھے کہ اب سب کچھ ٹھیک ہوجائے گا۔ کیا نیو ورلڈ آرڈر میں مذہب کی گنجائش نہ تھی…؟‘‘ کیا ایسے لوگ جو مذہب سے وابستہ تھے، آگے نہ بڑھ سکتے تھے…؟ کیا نیو ورلڈ آرڈر صرف ہیومن رائٹس کی لاٹھی ٹیک کر چلنا چاہتا تھا؟lll

شیئر کیجیے
Default image
بانو قدسیہ

Leave a Reply