نعت رسول ﷺ

میسر ہو اگر ایمان کامل

کہاں کی الجھنیں، کیسے مسائل

نہیں جن میں تمہارا عکس شامل

وہ نقشے ہیں مٹا دینے کے قابل

ثبوتِ عظمتِ انسانیت ہیں

محمد مصطفیؐ انسانِ کامل

تمہارا ہر قدم شمعِ ہدایت

تمہارا نقش پا تصویرِ منزل

ہزار آزادیوں سے لاکھ بہتر

تمہارے عشق کے طوق و سلاسل

تمہارے قولِ فیصل سے ہوئی ہے

نمایاں خیر و شر کی حدِّ فاصل

سکوں مجھ کو نہیں درکار آقاؐ

بڑھا دیجے مری بے تابی دل

اجازت ہو تو شاہاؐ! پیش کر دوں

مرے پہلو میں ہے ٹوٹا ہوا دل

حفیظؔ اس عشقِ احمدؐ کی بدولت

مجھے ہے دولتِ کونین حاصل