زمیں پر جب خدا کے آخری پیغامبر آئے
فرشتے آسماں سے آمنہ بی بی کے گھر آئے
وہی ہیں شافعِ محشر، وہی ہیں ساقیِ کوثر
جو لے کر حق تعالیٰ کی کتابِ معتبر آئے
بنے گی بات اے لوگو، وہی پھر سے زمانے میں
اگر امت میرے سرکار کی اک راہ پر آئے
پڑھو اے مومنو پیہم درود ان پر سلام ان پر
جو بن کر بینوا و بیکسوں کے چارہ گر آئے
نہ آیا آپ کا آقاؐ کوئی ہم رتبہ و ہمسر
ہزاروں انبیاء آئے، ہزاروں تاجور آئے
کروں گا مدحتِ خیر الوریٰ میں آخری دم تک
نہیں پروا اگر نیزے پہ اے فرقانؔ سر آئے
