احساس

— خوشی : ایک رحمت ہے، جس کا چشمہ کہیں اندر سے پھوٹتا ہے، اور کہیں اندر ہی اندر گم ہوجاتا ہے۔
— غم: ایک نعمت ہے جس سے زندگی سرسبز، دل کی وادی نرم اور آنکھوں میں ساون کی جھڑی رہتی ہے۔
— خوشبو: ایک ہیجان ہے، جو دور سے کسی کے آنے کا اور قریب سے کسی کے جانے کا پتہ دیتی ہے۔
— آسمان: ایک خیال ہے، تاحد نگاہ وسعتوں اور مسافتوں کا لبادہ اوڑھے کبھی سورج کو اپنے دامن میں سمیٹے دن میں مسرت کا سامان کرتا ہے، کبھی چاند کی کرنوں سے رات کو نہاتا ہے تو کبھی بارش کی صورت میں روتا اور ہنستا ہے۔
— ہوا: ایک شرارت ہے، جس کے جھونکے اٹکھیلیاں کرتے پتوں کو چھیڑتے ہیں، دھول اڑاتے چلے جاتے ہیں۔
— دوستی: کسی کی محبتوں، چاہتوں اور خلوص کا لباس ہے جو ہر ایک اپنے اپنے سائز کے مطابق پہنتا ہے۔ یہی وجہ ہے کہ ہر کوئی، ہر ایک کا دوست نہیں ہوتا۔ خوشی، غم ، خوشبو، آسمان، ہوا اور دوستی کے مجموعے کا نام ’’احساس‘‘ ہے۔
اسی لیے نہ تو انھیں کوئی چھو سکتا ہے اور نہ ہی دیکھ سکتا ہے۔