بیوہ اور مسکین کی خبر گیری

عَنْ اَبِیْ ہُرَیْرَۃَ ؓ: قَالَ قَالَ رَسُوْلُ اللّٰہِ ﷺ السَّاعِیْ عَلَی الاَرْمَلَۃِ وَالْمِسْکِیْنِ کَالسَّاعِیْ فِی سَبِیْلِ اللّٰہِ وَاَحْسِبُہٗ قَالَ کَالْقَائِمِ لَا یُفْتِرْ وَکَالصَّائِمِ لَا یُفْطِرْ۔
(متفق علیہ)
’’حضرت ابوہریرہ رضی اللہ عنہکی روایت ہے کہ رسول اللہ ﷺ نے ارشاد فرمایا کہ بیوہ عورت اور مسکین کی خبر گیری کرنے والا اس شخص کی مانند ہے جو اللہ کی راہ میں کوشش کرے۔ اور راوی کہتے ہیں کہ میرا گمان ہے کہ آپﷺ نے یہ بھی بیان کیا کہ بیوہ عورت و مسکین کی خبر گیری کرنے والا اس شخص کی مانند ہے جو نمازو عبادت کے لیے شب بیداری کرتا ہے اور اپنی شب بیداری میں کوئی سستی نہیںکرتا۔ اور اس شخص کے مانند ہے جو ہمیشہ روزہ رکھتا ہے۔
ایک عورت بیوہ ہونے پر کس قدر مجبور و بے کس ہوجاتی ہے اور اس کو کس قدر دقتوں اور پریشانیوں کا سامنا کرنا پڑتا ہے، ان سب باتوں کے پیش نظر اللہ کے رسول ﷺ نے ایک بیوہ و مسکین کی خبر گیری کرنے والے کے لیے بہت بڑے اجر و ثواب کی بشارت دی ہے۔ اس طرح جب کوئی ان کی ضروریات کا خیال رکھتا ہے اور ان کی خبر گیری کرتا ہے تو وہ خود اپنے حق میں بھی بہتر کرتا ہے۔