دستر خوان

بھرے ہوئے کھٹے آلو

اجزا: آلو بڑے سائز کے چھ عدد، کلونجی آدھا چائے کا چمچہ، میتھی کے دانے چھ عدد، پیاز درمیانی ڈلی دو عدد، آملیٹ کی طرح کٹی ہوئی، سونف آدھا چائے کا چمچہ، رائی آدھا چائے کا چمچہ، ان تینوں کو باریک پیس لیں۔ سوکھی کھٹائی پسی ہوئی چار کھانے کے چمچے، ہلدی آدھا چائے کا چمچہ، لال مرچ پسی ہوئی آدھا چائے کا چمچہ، لیموں تین عدد، ڈالڈا تیل دو پیالی۔

ترکیب: آلو چھلکے سمیت پانچ منٹ کے لیے ابال لیں۔ پھر چھلکا اتار کر درمیان میں کراس کی طرح چیرا لگالیں مگر یہ دھیان رکھیں کہ آلو پورا نہ کٹ جائے۔ ایک دیگچی میں ایک کھانے کا چمچہ تیل لے کر سارے مصالحوں کو ہلکا سا بھون لیں، پھر ٹھنڈا کرکے آلو میں تھوڑا مصالحہ بھر دیں اور ہلکا سا دبا کر بند کردیں۔ سارے آلو اسی طرح سے بند کرکے رکھتے جائیں۔ ایک کڑھائی میں تیز آنچ میں تیل گرم کریں، پھر دو دو آلو ہلکی آنچ پر فرائی کرلیں۔ لال ہونے لگیں تو نکال کر دیگچی میں پھیلا کر رکھتی جائیں۔ اوپر سے لیموں کا رس چھڑک کر ہلکی آنچ میں دم پر رکھ دیں۔

آلو کے کباب

اجزا: آلو ایک کلو، انڈے دو عدد سخت ابلے ہوئے، ہری مرچ چار عدد باریک کٹی ہوئی، ہرا دھنیا ایک گٹھی باریک کٹا ہوا، پیاز درمیانے سائز کی ایک عدد، باریک آملیٹ کی طرح کٹی ہوئی، ڈبل روٹی کا چورا ایک پیکٹ چھان کر باریک پیس لیں، انڈا ایک عدد کباب میں لگانے کے لیے، کالی مرچ پسی ہوئی ایک چائے کا چمچہ، سفید زیرہ بھنا ہوا ایک چائے کا چمچہ باریک پیس لیں، نمک حسب ذائقہ ، ڈالڈا گھی دو پیالی۔

ترکیب: آلوؤں کو اچھی طرح سے دھوکر ابال لیں۔ ان کا چھلکا اتار کر کانٹے سے بھرتہ بنالیں۔ ابلے ہوئے انڈے بھی اس میں ملادیں اور سب مصالحے ملا کر اچھی طرح سے گوندھ کر تھوڑی دیر کے لیے رکھ دیں۔ تھوڑی دیر بعد تھوڑے تھوڑے آلو لے کر ہاتھ گیلا کرکے کباب بنالیں۔ ایک پیالے میں انڈا پھینٹ کر رکھ لیں، اخبار پر چورا پھیلا کر رکھ لیں، جب تلنا ہو تو کباب میں پہلے انڈا لگالیں پھر چورا اور ہلکی آنچ میں ڈیپ فرائی کریں۔

آلو کا رائتہ

اجزا: آلو ایک پاؤ، دہی ڈیڑھ پاؤ، پیاز ایک عدد بڑی، گرم مسالہ آدھا چمچہ چائے کا، نمک حسب ذائقہ، سرخ مرچ حسب ذائقہ، بالائی ۶۰ گرام، ہرا دھنیا حسب ضرورت۔

ترکیب: آلوؤں کو نمک ڈال کر ابال لیں اور چھیل کر چھوٹے چھوٹے ٹکڑے کرلیں۔ دہی میں بالائی اور تھوڑا سا دودھ ملائیں اور خوب پھینٹ کر اس میں پیاز باریک کاٹ کر ڈال دیں۔ نمک، سرخ مرچ اور گرم مسالا ملادیں۔ آلو کے ٹکڑے بھی اس میں ملادیں اور تھوڑا سا ہرا دھنیہ کاٹ کر اوپر ڈال دیں۔

کریلے کا اچار آم کے ساتھ

اجزا: آم کچے دو کلو، کریلے ایک کلو، سونف ۶۰ گرام، میتھی ۶۰ گرام، کلونجی ۶۰ گرام، لال مرچ حسبِ ذائقہ، ہلدی حسب ضرورت، نمک حسب ذائقہ، تیل سرسوں دو کلو۔

ترکیب: سوائے میتھی کے سب چیزوں کو آدھ پیس لیں۔ ان مسالوں میں تھوڑا سا سرسوں کا تیل ڈال کر ملیدہ ساتیا رکرلیں۔ اب آم صاف کرکے دھوئیں اور خشک کرکے ان کو درمیان سے کاٹ کر چار چار ٹکڑے کرلیں۔ گٹھلی نکالیں یا رہنے دیں آپ کی پسند پر منحصر ہے ان میں تیار شدہ مسالہ بھر کر ایک طشت میں رکھتے جائیں۔ اب ان کو مٹی کی ہانڈی میں یا کسی مرتبان میں ڈال دیں اور بچا ہوا مسالہ بھی ڈال دیں۔ برتن پر ڈھکنا رکھ کر اس کا منہ کپڑے سے باندھ دیں اور اس کو متواتر تین دن تک دھوپ میں رکھیں۔ برتن کو اچھی طرح ہلاتے رہیں۔ تین دن کے بعد اس کو کھولیں اور کریلے دھوکر صاف کرکے خشک کرلیں پھر ان کے چار چار ٹکڑے کرکے بیج نکال لیں اور آم کے اچارمیں شامل کردیں اور اس کو ملا کر یکجان کردیں اور پھر اس کا منہ بند کردیں دو دن اسی طرح دھوپ میں رکھیں۔ پانچ دن کے بعد اس میں سرسوں کا تیل ڈال دیں، تیل اتنا ہونا چاہیے کہ اس میں اچار ڈوب جائے۔ اس کے بعد اس کو پھر تین چار دن بند رکھیں اور سارا دن دھوپ میں رکھا رہنے دیں۔ چار پانچ دن کے بعد اچار تیار ہوجائے گا یا زیادہ سے زیادہ آٹھ دن کے بعد اور بہت مزیدار ہوگا۔

افغانی گوشت

اجزاء: نرم گوشت بغیر ہڈی ایک کلو، پیاز ۱۰۰ گرام، ادرک ۵۰ گرام، آلو ۵۰۰ گرام، خشک دھنیا ایک چائے کا چمچہ (پسا ہوا)، ٹماٹر ۵۰۰ گرام، سبز مرچ ۵۰ گرام، سیاہ مرچ حسب ضرورت، گھی حسب ضرورت، سبز دھنیا تھوڑا سا، نمک حسب ذائقہ۔

ترکیب: گوشت کے چھوٹے چھوٹے ٹکڑے کرلیں۔ ایک دیگچی میں گھی ڈال کر چولہے پر رکھیں۔ خوب گرم ہوجائے تو اس میں گوشت کے ٹکڑے تل لیں پھر اس میں نمک پسا ہوا دھنیا اور پسی ہوئی ادرک ڈال کر بھون لیں بھوننے کے بعد اتنا پانی ڈالیں کہ اس میں گوشت گل جائے۔ پیاز اور ٹماٹر کے موٹے موٹے ٹکڑے کرلیں اور آلو کو گول گول قاشیں بنا لیں۔ پھر انہیں گھی میں تل لیں۔ احتیاط یہ کریں کہ ٹماٹر کے ٹکڑے گھل نہ جائیں پیاز اور آلو کو بھی اسی قدر تلنا چاہیے کہ وہ صرف نرم ہوجائیں، جب دیکھیں کہ گوشت گل گیا اور پانی برائے نام رہ گیا ہے تو ان تلی ہوئی چیزوں کو اس میں ملادیں۔ اس کے ساتھ ہی سیاہ مرچ سبز مرچ اور سبز دھنیا ملائیں اور بالکل ہلکی آنچ پر دم دے دیں۔ بعض لوگ اس میں تلی ہوئی گاجر اور مٹر بھی ملا لیتے ہیں اور انار دانے پودینے اور دہی کی چٹنی کے ساتھ دستر خوان کی زینت بناتے ہیں۔

چاکلیٹ آئس کریم

(۱) اشیا: بالائی ۶۰ گرام، چینی ۱۸۰ گرام، وینلا ایسنس ۱۰ گرام، چاکلیٹ ۱۲۰گرام، انڈے پانچ عدد۔

ترکیب: بالائی اور چاکلیٹ کو اچھی طرح ملا کر ہلکی آنچ پر پکائیے انڈے کو پھینٹ کر اس میں ملا دیجیے اور پکاتے رہیے تھوڑی دیر بعد چولہے سے اتار کر ٹھنڈا کرکے اس میں وینلا ایسنس ملا کر مشین میں جما لیجیے۔

(۲) اشیا: دودھ ۵۰۰ گرام، کریم تازہ ۱۲۵ گرام، چینی ۱۲۵ گرام، چاکلیٹ پاؤڈر دوپیکٹ۔

ترکیب: یہ پاؤڈر بالکل کسٹرڈ کی طرح ہوتا ہے اور اسی طرح بنایا جاتا ہے۔ دودھ کو پکاکر خشک کرکے ۱۰۰ گرام کرلیں۔ ٹھنڈے دودھ میں دو پیکٹ گھول کر ڈالیں اورخوب حل کریں۔ پھر پکتے ہوئے دودھ میں چینی ڈالیں اور بعد میں چاکلیٹ پاؤڈر جو کہ تیار شدہ ہو ڈال کر خوب چمچہ چلائیں اب نیچے اتار لیں اور ٹھنڈا ہونے دیں جب نیم گرم رہ جائے تو اس میں کریم یا مکھن ملادیں اور انڈا پھینٹنے والی مشین سے خوب پھینٹ لیں اور پھر تھوڑا اور ٹھنڈا کرکے یہ مرکب آئس کریم مشین میں ڈال کر جمالیں۔

نوڈلز

(۱) اشیا: گاڑھی مرغ یخنی ڈھائی کپ مرغی ۱۲۵ گرام، نوڈلز ۴۵۰ گرام، انڈے ۲ عدد، بند گوبھی ۱۲۵ گرام، سبز پیاز ۲ عدد، نمک حسب ذائقہ۔

ترکیب: نوڈلز کو ابلتے ہوئے نمکین پانی میں ابال لیں اور اچھی طرح نچوڑ لیں۔ یخنی کو دیگچی میں گرم کریں اور اس میں حسب پسند نمک ڈالیں۔ پکی ہوئی نوڈلز کو پیالوں میں ڈالیں اور ان کے اوپر گرم یخنی ڈالیں۔ مرغی کے گوشت کے چھوٹے چھوٹے ٹکڑوں کو انڈوں کے قتلے بند گوبھی اور سبز پیاز اوپر سجا کر پیش کریں۔

(۲) اشیا: موٹی نوڈلز ۴۵۰ گرام، بند گوبھی ۱۰۰ گرام، مرغی کا گوشت ۱۲۵ گرام، سویاساس ۲ بڑے چمچ، اجینو موتو آدھا چھوٹا چمچ، کالی مرچ حسب ذائقہ۔

ترکیب: بند گوبھی کو ابلتے پانی میں ایک منٹ کے لیے ڈالیں پھر نکال کر نچوڑ لیں۔ کڑاہی میں آئل ڈال کر پکے ہوئے گوشت کو دو تین منٹ بھونیں اب اس میں پکی نوڈلز سویا ساس اجینو موتو کالی مرچ ڈالیں گوبھی ڈال دیں اور کفگیر چلاتے ہوئے اچھی طرح گرم کرکے پیش کریں۔