شرک

ایک حکایت بیان کی جاتی ہے کہ کوئی بزرگ عقیدت مندوں کے حلقے میں بیٹھے تھے کہ ایک نقاب پوش عورت آئی اور بزرگ سے کہا: ’’حضرت میرا خاوند دوسری شادی کرنا چاہتا ہے۔ میں آپ کے پاس اس لیے آئی ہوں کہ آپ اسے ایسا کرنے سے روک دیں۔‘‘

بزرگ نے جواب دیا: ’’بی بی! جب خدا نے تمہارے خاوند کو اس بات کی اجازت دے رکھی ہے تو بھلا میں اسے کیسے روک دوں؟‘‘

عورت بولی: ’’حضرت اگر مجھے اس بات کی اجازت ہوتی کہ میں اپنا نقاب اٹھا کر آپ کو اپنی صورت دکھا سکوں تو آپ مان جاتے کہ میں اپنے اس مطالبے میں حق بجانب ہوں۔‘‘

بزرگ نے متعجب ہوکر پوچھا: ’’وہ کیسے؟‘‘

عورت بولی: ’’وہ ایسے کہ میں اس قدر خوبصورت ہوں کہ اگر آپ مجھے دیکھ لیںتو قائل ہوجائیں کہ مجھ جیسے عورت کی کوئی شریک نہیں ہونی چاہیے۔‘‘

بزرگ نے یہ بات سنی تو غش کھا کر گر پڑے۔ لوگ سخت حیران ہوئے کہ عورت کی بات میں آخر کون سا ایسا راز تھا کہ بزرگ کو غش آگیا۔تھوڑی دیر بعد جب ان کو ہوش آیا تو لوگوں نے ان سے اس طرح بے حال ہوجانے کی وجہ دریافت کی۔

بزرگ نے بتایا کہ جب عورت نے کہا کہ مجھ جیسی حسین عورت کا کوئی شریک نہیں ہونا چاہیے تو مجھے نیلے آسمانوں سے ایک آواز یہ کہتی سنائی دی ’’ذرا دیکھ اس عورت کو۔ محض اس لیے کہ اسے خوبصورتی دی گئی ہے یہ خاوند کو اس بات کا حقدار نہیں سمجھتی کہ وہ اس کی کوئی شریک لے آئے۔ ادھر میں اس جیسی کروڑوں پیدا کرچکا ہوں اور کروڑوں پیدا کروں گا۔ اگر یہ معمولی حسن و جمال رکھتے ہوئے یہ سمجھتی ہے کہ اس کا کوئی شریک نہیں ہونا چاہیے تو پھر میں جو ہر قسم کے حسن کو پیدا کرنے والا ہوں یہ کیسے پسند کرسکتا ہوں کہ میرے ساتھ شریک کیا جائے۔‘‘