غزل

رخصت ہوا تو آنکھ ملا کر نہیں گیا

وہ کیوں گیا ہے یہ بھی بتا کر نہیں گیا

وہ یوں گیا کہ بادِ صبا یاد آگئی

احساس تک بھی ہم کو دلا کر نہیں گیا

یوں لگ رہا ہے جیسے ابھی لوٹ آئے گا

جاتے ہوئے چراغ بجھا کر نہیں گیا

بس اک لکیر کھینچ گیا درمیان میں

دیوار راستے میں بناکر نہیں گیا

شاید وہ مل ہی جائے، مگر جستجو ہے شرط

وہ اپنے نقش پا تو مٹا کر نہیں گیا

گھر میں ہے آج تک وہی خوشبو بسی ہوئی

لگتا ہے یوں کہ جیسے وہ آکر نہیں گیا

تب تک تو پھول جیسی ہی تازہ تھی اس کی یاد

جب تک وہ پتیوں کو جدا کر نہیں گیا

رہنے دیا نہ اس نے کسی کام کا مجھے

اور خاک میں بھی مجھ کو ملا کر نہیں گیا

پروین شاکر کی ویڈیو دیکھنے کے لیے کلک کریں!

پروین شاکر کی غزلیں

مزید غزلیں!

بجھی بجھی ہوئی آنکھوں میں گوشوارۂ خواب

جھونکا ہوا کا تھا کوئی آیا گزر گیا

مانا ہم سے دیوانے دیواروں سے سر ٹکرائیں گے