لذیذ پکوان

لکھنوی کباب

اشیاء: قیمہ ایک کلو، کچا پپیتہ ایک عدد، پیاز ۳ عدد (درمیانہ سائز)، پسا ہوا گرم مسالہ ایک چمچہ، ادرک ایک چمچہ (پسا ہوا)، بادام ۱۲ عدد، سرخ مرچ ایک چمچہ، دہی آدھا کپ، تیل ایک کپ۔

سلاد کے لیے اجزاء: پیاز ایک عدد (لچھے دار کٹا ہوا) ٹماٹر ایک عدد (گول قتلے)، ہری مرچ ۲ عدد، پودینے کے پتے ایک گٹھی، لیموں ایک عدد۔

ترکیب: کچے پپیتے کو چھلکے سمیت پیس لیں اور اس کے چار چمچ قیمے میں ملادیں، ساتھ ہی نمک بھی ملائیں اور قیمے کو ایک گھنٹہ رکھ دیں۔ تین عدد پیاز باریک کاٹ کر آئیل میں براؤن کریں اور اسے ہلکا سا پیس لیں۔ ادرک اور بادام کو بھی پیس لیں اور پسے بادام، ادرک اور پیاز کو دہی میں مکس کردیں، پھر اس پیسٹ میں دو کھانے کے چمچ تیل ڈال کر گرم مسالہ شامل کریں اور اسے قیمے میں ملادیں۔ اب قیمے کے چھوٹے چھوٹے کباب بنائیں۔

بیکنگ ڈش میں برش سے تیل لگائیں اور اس میں کباب رکھ کر معتدل درجے پر گرم کیے ہوئے اوون میں رکھ کر ایک گھنٹہ تک کبابوں کو بیک کریں۔ یہاں تک کہ وہ گل جائیں اور پک کر براؤن ہوجائیں۔ ڈش کے چاروں جانب پیاز کے لچھے، پودینے کی پتیاں، ٹماٹر کے قتلے، ہری مرچ اور لیموں کے ٹکڑے سجاکر پیش کریں۔

ایرانی آلو مکس کباب

اجزاء: آلو آدھا کلو (ابلے ہوئے)، گوشت ایک پیالی (ابلا ہوا)، پیاز دو عدد، انڈے دو عدد، بیسن ۲ چمچے، گرم مسالہ ایک چمچہ، مرچ ایک چمچہ، نمک حسبِ ذائقہ، ادرک ایک چمچہ، انار دانہ ایک چمچہ، خشک دھنیا ایک چمچہ، پسا ہوا پودینہ ایک چمچہ، تیل ایک پیالی، دہی آدھا کپ۔

ترکیب: گوشت کے ریشے کرلیں اور ابلے ہوئے آلوؤں کو پیس لیں۔ پیاز کو پیس کر آلو اور گوشت میں شامل کردیں۔ بیسن، مرچ، نمک، گرم مسالہ ، دہی، سبز دھنیا، ادرک اور پسا ہوا انار دانہ ملاکر مکس کریں اور اس آمیزے کو پیس کر گول ٹکیاں تیار کرلیں۔ کڑاہی میں تیل گرم کرکے ٹکیوں کو انڈوں کے آمیزے میں ڈبو کر تل لیں۔

انڈونیشین کباب

اجزاء: قیمہ آدھا کلو، آلو آدھا کلو، پیاز ۳ عدد، انڈے ۳ عدد (زردی)، سبز پیاز ۴ عدد، سلاد ۴ پتے، سبز مرچ ۸ عدد، کالی مرچ ۲ چمچے، تیل حسبِ ذائقہ۔

ترکیب: آلوؤں کو درمیانے سائز کا کاٹ لیں۔ سبز پیاز اور سلاد باریک کاٹ لیں۔ خشک پیاز کو باریک کاٹ کر تل لیں۔ قیمے میں سبز پیاز اور سلاد ملا کر پیس لیں۔ کٹے ہوئے آلوؤں کو تیل میں تل لیں اور قیمے میں مکس کریں۔ اس میں کالی مرچ پسی ہوئی، نمک اور انڈوں کی زردی مکس کردیں۔

جب آمیزہ اچھی طرح سے مکس ہوجائے تو کباب بنالیں اور انڈوں کی سفیدی میں ڈبو ڈبو کر کباب تل لیں۔

نہاری

اجزاء: نہاری کا گوشت (بونگ والا)ڈیڑھ کلو، پیاز آدھا کلو، پسا ہوا دھنیا چار چائے کے چمچے،لہسن کے جوے ۶ عدد، کٹی ہوئی لال مرچ تین چائے کے چمچ، دہی ایک پاؤ، ہلدی ایک چائے کا چمچہ، نمک حسبِ ذائقہ، تیل حسبِ ضرورت، سونف، سفید زیرہ، سونٹھ تینوں اشیاء تقریباً ایک چھٹانک توے پر بھون کر پیس کر علیحدہ رکھ لیں، آٹا دو چائے کے چمچے۔

ترکیب: گوشت کو اچھی طرح دھولیں اور پھر دیگچی میں ڈال کر چولہے پر رکھ دیں۔ پانی سوکھ جائے تو چند منٹ کے بعد لہسن کے جوے ڈال کر اور پیاز باریک کاٹ کر پسا ہوا دھنیا، ہلدی، نمک اور لال مرچ ڈال دیں۔ ایک دو بار چمچ چلا کر تیل شامل کریں اور پکنے دیں۔ ۱۵؍منٹ کے بعد پانی اتنا ڈال دیں کہ گوشت گل جائے۔ تقریباً ڈیڑھ گھنٹہ پکنے کے بعد گوشت گل چکا ہوگا۔ اب سونف، سفید زیرہ، سونٹھ بھی گوشت میں ڈال کر پکنے دیں۔ شوربا اپنی مرضی کے مطابق رکھنے کے بعد توے پر آٹا بھونیں اور پانی میں گھول کر وہ بھی ملادیں۔ تیل اوپر آجائے تو چولہا بند کردیں۔ مزے دار نہاری تیار ہے۔ یہ نہاری سادہ روٹی یا تندوری روٹی کے ساتھ بہت مزا دے گی۔ علیحدہ پلیٹ میں لیموں کے ٹکڑے ۶ عدد، ادرک باریک کٹی ہوئی آدھی چھٹانک، ہری مرچ ۶ عدد (کٹی ہوئی)، ہرا دھنیا تھوڑا سا اور براؤن کی ہوئی پیاز رکھ دیں۔ لطف دوبالا ہوجائے گا۔

مسالہ بھیجہ

اجزاء بھینس کا بھیجہ ایک عدد، لال پسی ہوئی مرچ ایک چائے کا چمچہ، پسا دھنیا ڈیڑھ کھانے کا چمچہ، گرم مسالا ایک چائے کا چمچہ، پسا ہوا ادرک، لہسن ایک کھانے کا چمچہ، پیاز دو عدد، ہرا دھنیا ایک گڈی، ہری مرچ تین عدد، ادرک ایک بڑا ٹکڑا، ٹماٹر دو عدد، نمک حسبِ پسند، تیل ڈیڑھ کپ۔

ترکیب: بھیجے کو ابال کر اس کی نسیں نکال کر چھوٹے چھوٹے ٹکڑے کرلیں۔ پھر ایک پین میں تیل گرم کرکے پیاز گولڈن براؤن کرلیں۔ ٹماٹر، ادرک، لہسن اور دیگر مسالے ڈال کر، اچھی طرح بھون لیں۔ اب بھیجہ ڈال کر آہستہ آہستہ چمچہ چلاتی رہیں۔ جب تیل اوپر آجائے تو ہرا دھنیا، پسا ہوا گرم مسالہ اور باریک کٹی ہوئی ادرک اور مرچ ڈال دیں۔ مزے دار بھیجہ مسالا گرم چپاتی کے ساتھ سرو کریں۔

چٹ پٹا قیمہ

اجزاء: قیمہ آدھا کلو، پیاز دو عدد (درمیانی) لہسن ادرک کا پیسٹ ایک کھانے کا چمچہ، ہرا دھنیا تھوڑا سا، نمک مرچ حسبِ ذائقہ، ہری مرچ چار عدد، تیل پکانے کے لیے۔

ترکیب: دیگچی میں قیمہ ڈال کر آدھی پیالی پانی ڈالیں۔ نمک، مرچ، ادرک، لہسن، باریک کٹی ہوئی پیاز ڈال کر پکائیں۔ جب پانی خشک ہوجائے تو تیل ڈال کر بھونیں۔ قیمہ تیل چھوڑ دے تو ہری مرچ کاٹ کر ڈالیں اور چولہے سے اتار کر ہرا دھنیا چھڑک کر تناول فرمائیں۔

سری پائے

اجزاء: بکرے کے پائے چار عدد (صاف کرکے ٹکڑے کروالیں) سری ایک عدد، پیاز ایک عدد بڑی (باریک کٹی ہوئی) نمک حسبِ ذائقہ، لال مرچ ایک کھانے کا چمچہ، ہلدی اور دھنیا پاؤڈر ایک ایک کھانے کا چمچہ، ادرک، لہسن کا پیسٹ ایک کھانے کا چمچہ، دہی دو کپ، ہری مرچ ۵ عدد (باریک کاٹ لیں) گرم مسالا ایک کھانے کا چمچہ، تیل ڈیڑھ پیالی۔

ترکیب: ایک بڑی دیگچی میں صاف کیے ہوئے سری پائے کو تھوڑا سا لہسن، ادرک اور ۸ سے ۹ گلاس پانی ڈال کر چولہے پر چڑھا دیں۔ مستقل ۲ گھنٹے ہلکی آنچ پر پکائیں۔ جب سری پائے گل جائیں تو دوسری دیگچی میں تیل ڈال کر پیاز براؤن کرلیں، اب دہی، نمک، لال مرچ، ہلدی اور باقی تیار کیے ہوئے تمام مسالے ڈال کر ۸ سے ۱۰ منٹ تک اچھی طرح بھونیں۔ پھر اس میں تیار شدہ سری پائے یخنی سمیت شامل کردیں۔ پانچ منٹ پکانے کے بعد ہلکی آنچ کرلیں اور ڈھکن پر کپڑا لپیٹ کر ۱۵ سے ۲۰ منٹ کے لیے دم پر رکھ دیں۔ تیل اوپر آجائے تو چولہا بند کردیں۔ روغنی نان یا کلچے کے ساتھ مزے دار سری پائے سرو کریں۔

بھنڈی کے شامی کباب

اشیاء: ڈیڑھ کلو بھنڈی، آدھا کلو چنے کی دال، ۱۵ گرام تلی پیاز کا پیسٹ، دس گرام کالی مرچ پاؤڈر، دس گرام چندن پاؤڈر، ایک گرام جاوتری پاؤڈر، چند قطرے کیوڑا، پانچ گرام تیزپات، نمک اور مرچ حسبِ ذائقہ۔

ترکیب: بھنڈی کو اچھی طرح دھوکر تین چار ٹکڑوں میں کاٹ لیں، چنے کی دال دھولیں، چنے کی دال، کٹی ہوئی بھنڈی، تیز پات پانی میں ڈال اور ڈھک کر دھیمی آنچ پر پکائیں، جب گل جائیں تو آنچ سے اتار کر پانی نچوڑنے کے لیے کسی جالی دار برتن میں رکھ دیں کہ ٹھنڈا ہوجائے۔ ٹھنڈاہوجانے پر مکسر میں پیس کر پیسٹ بنالیں۔ اور بقیہ تمام چیزیں اس میں مکس کردیں۔ پندرہ بیس منٹ فریج میں ٹھنڈا ہونے کے لیے رکھ دیں۔ فریج سے نکال کر شامی کباب کے شکل کی ٹکیاں بناکر فرائی کرلیں۔

پپیتے کا حلوہ

اشیاء: ایک کلو کچا پپیتا، ۲۰۰ گرام دیسی گھی، ۲۰۰ گرام ماوا، (دودھ کا کھویا)، ایک کلو شکر، ۲۰۰ گرام کاجو، ۲ گرام الائچی پاؤڈر۔

ترکیب: کچے پپیتے کو چھیل کر کدو کش کرلیں۔ اس میں دو لیٹر پانی ڈال کر دھیمی آنچ پر پانچ منٹ تک پکائیں، اس کے بعد اتار کر پانی چھان لیں۔ الائچی پاؤڈر، شکر اور دیسی گھی ڈال کر دھیمی آنچ پر ۲۰ منٹ پکائیں اور مسلسل چلاتی رہیں۔ پھر اس میں کاجو اور ماوا ملاکر دس پندرہ منٹ پکائیں۔ گرم گرم حلوہ پیش کریں۔

گلاب جامن

اجزاء: خشک دودھ ایک پیالی، سوجی آدھی پیالی، میدہ آدھی پیالی، پھیکا کھویا آدھی پیالی، بیکنگ پاؤڈر چوتھائی چائے کا چمچہ، تیل دو کھانے کے چمچے، ان سب چیزوں کو اچھی طرح ملا کر آٹے کی طرح گوندھ لیں، پانچ منٹ کے لیے رکھ دیں، پھر چھوٹے چھوٹے گولے بنالیں۔ شیرا بنانے کے لیے چینی دو پیالی، پانی ایک پیالی، چھوٹی الائچی آٹھ عدد، دانے نکال کر باریک پیس لیں۔

ترکیب: چینی میں پانی ملا کر ہلکی آنچ میں شیرا بنا لیں۔ جب شیرا بننے لگے تو الائچی ڈال کر اتارلیں۔ ایک کڑھائی میں گھی گرم کریں، گھی تقریباً دو پیالی ہونا چاہیے تاکہ گلاب جامن اچھی طرح تلے جاسکیں۔ جب گھی تیز گرم ہوجائے تو ہلکی آنچ کرکے گولے تلنا شروع کردیں، جب براؤن ہوجائیں تو نکال کر شیرے میں ڈال دیں۔