گلدستہ

دو حدیثیں
۱-حضرت عائشہ ؓ سے روایت ہے کہ رسول ﷺ نے ارشاد فرمایا: اللہ تعالیٰ نرمی کرنے والا ہے اور ہر معاملے میں نرمی کو پسند کرتا ہے۔
۲- حضرت ابوہریرہؓ سے مروی ہے کہ رسول ﷺ ارشاد فرماتے ہیں بدگمانی سے بچو کیونکہ بدگمانی سب سے زیادہ جھوٹی بات ہے۔
بشری ترنم۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔مرادآباد
تعجب ہے
— اس پر جو اللہ تعالیٰ کو حق جانتا ہے پھر بھی غیر اللہ سے وابستہ ہے۔
— اس پر جو شیطان کو دشمن سمجھتا ہے پھر بھی اس کی اطاعت کرتا ہے۔
— اس پر جو دنیا کو فانی سمجھتا ہے پھر بھی اس کے پیچھے بھاگتا ہے۔
— اس پر جو تقدیر کو جانتا ہے پھر بھی جانے والی چیزوں کا غم کرتا ہے۔
— اس پر جو دوزخ کو حق جانتاہے پھر بھی گناہ پر گناہ کرتا ہے۔
ارم جہاں۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بریلی
زندگی
— زندگی کا سب سے قیمتی حصہ وہ ہے جو خدا کی خوشنودی کے لیے صرف کیا ہو۔ زندگی ایک امتحان ہے اس میں کامیابی حاصل کرنے والا سرخ رو ہے۔ زندگی ایک ایسا ہیرا ہے جسے تراشنا انسان کا کام ہے۔ زندگی ایک ایسا باغ ہے، جس میں پھول اور کانٹے بھی ہیں۔
نور افشاں۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔رامپور
زبان
شیطانی نفس کا ایک دوسرا ایجنٹ زبان ہے کتنے ہی فتنے ہیں جو زبان سے پیدا ہوتے ہیں۔ زبان میں ہڈی نہیں ہوتی لیکن وہ کھوپڑی توڑ سکتی ہے۔ کانٹوں سے بھری ٹہنی کو ایک پھول خوبصورت بنادیتا ہے۔
روبینہ انیس۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔رائے گڑھ
علم
— علم زندگی ہے اس کی قدر کیجیے۔
— علم طاقت ہے اسے بڑھائیے۔
— علم انسانیت ہے اسے اپنائیے۔
— علم خزانہ ہے اسے ڈھونڈئیے۔
— علم دین ہے اسے سیکھئے۔
— علم دولت ہے اسے حاصل کیجیے۔
اسماء پروین ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔آکولہ
قطعہ
ذہن روشن نہ تھے دل کشادہ نہ تھا
بند کمروں میں گھر کے اجالا نہ تھا
منحصر تھا ہواؤں کے رخ پر سفر
اور ہواؤں کا کوئی بھروسہ نہ تھا
عائشہ احمد۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بالا پور
مہکتی کلیاں
— قسمت ہمارے معاملات کو ہماری آرزوؤں تمناؤں سے بہتر طور پر چلاتی ہے۔ (کیوکروٹی)
— قسمت ملکیت کے طور پر نہیں آزمائش کے طور پر تمہارے پاس آتی ہے۔ (رابن مور)
— میں اس بات سے انکار نہیں کرتا کہ دولت بولتی ہے۔ ایک دفعہ اس نے مجھ سے کہا: خدا حافظ!
(آرمز)
وحیدہ رحمن۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔آرمور
جاپان
— کیمی گاؤ جاپان کا قومی ترانہ ہے۔
— جاپان کا قومی پھول گلِ داؤدی ہے۔
— جاپان کا سرکاری مذہب شنتو ازم ہے۔
— جاپانی زبان اوپر سے نیچے کی جانب لکھی جاتی ہے۔
— جاپان کے سکے کا نام ین ہے۔
— جاپان کا پرانا نام زپاگ (Zapag) ہے۔
— جاپان کا رقبہ ۸۱۵،۴۲،۱ مربع میل ہے۔
— ڈولی آئی اور کویوڈو نیوز سروس جاپان کی خبر رساں ایجنسیاں ہیں۔
عبدالرحمن عارف۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔نئی دہلی
معلومات
— دنیا کا سب سے بڑا ریڈیو اسٹیشن ماسکو میں ہے۔
— انسان اور بندر کو ایک جیسا زکام ہوتا ہے۔
— دنیا میں کل ۳۰۶۴ زبانیں بولی جاتی ہیں۔
— انسانی جسم میں ۲۰۶ ہڈیاں، ۲۶۰ جوڑ اور ۵۰۰ رگیں ہوتی ہیں۔
بشریٰ فہد۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔منگلور
سب سے برا انسان
— دنیا کا سب سے برا انسان وہ ہے جو اپنی خامیوں کو نظر انداز کرتا اور دوسروں کے عیبوں کو تلاش کرتا ہے۔
عطاء الحق۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔علی گڑھ
حکمت کی باتیں
— تین آدمی تین چیزوں سے محروم رہتے ہیں: (۱) جلد باز کامیابی سے (۲) غصب ناک صحیح اقدام سے (۳) جھوٹا عزت سے۔
— اپنی مدد آپ کامیابی کا سب سے بڑا اصول ہے۔
— انسانوں کی بے غرضی سے خدمت کرنا انسانیت کی معراج ہے۔
— سچائی سراپا سکون اور اطمینان ہے جبکہ جھوٹ سراپا شک و تذبذب ہے۔
— اخلاق، صداقت اور بندگی انسان کو باعزت بناتے ہیں۔
ثمرین فردوس۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔کالی دولت خان
کام کی باتیں
— اپنے والدین کی نافرمانی کرنے والا ہرگز کامیاب نہیں ہوسکتا۔
— رشوت لینے والے اور رشوت دینے والے پر اللہ کی لعنت ہے۔
— جہنم کی آگ سے بچو، خواہ آدھی کھجور صدقہ کرکے ہی سہی۔
— دل کی سب سے بڑی بیماری حسد ہے۔
— زندگی وہ ہے جو دوسروں کے کام آئے۔
— نیک عورت غریب سے غریب گھر کو بھی سنوار سکتی ہے۔
— ناقابلِ اعتبار دوست سے تنہا رہنا بہتر ہے۔
پیرزادہ معراج الدین۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔سلّر، کشمیر
رباعی
حالات کے قدموں میں قلندر نہیں گرتا
ٹوٹا بھی جو تارا تو زمیں پر نہیں گرتا
گرتے ہیں سمندر میں بڑے شوق سے دریا
لیکن کسی دریا میں سمندر نہیں گرتا
پٹھان عطاء اللہ خان۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بسمت نگر
آپ جانتے ہیں کہ اونٹ کو ریگستان کا جہاز کہا جاتا ہے۔ صحرائی علاقوں میں اونٹ کی مقبولیت کا سب سے بڑا سبب یہ ہے کہ وہ پانی پیے بغیر دنوں اور ہفتوں صحرا میں سفر کرسکتا ہے۔ آپ نے کبھی یہ سوچا ہے کہ ایسا کیوں کر ممکن ہے۔ اگر آپ کو نہیں پتہ تو کوئی بات نہیں، ہم اس راز سے پردہ اٹھاتے ہیں۔
صدیوں سے اونٹ کی اس غیر معمولی قوتِ برداشت کی مختلف وجوہ پیش کی جاتی رہی ہیں۔ ایک عام خیال یہ تھا کہ اونٹ کے پیٹ میں ایک ایسی تھیلی ہوتی ہے جس میں وہ دو ہفتے تک کا پانی محفوظ کرلیتا ہے۔ چنانچہ اس قسم کی کہانیاں بہت مشہور ہوئیں کہ جب کبھی قافلے صحراؤں میں بھٹک جاتے ہیں اور پانی کا ذخیرہ ختم ہوجاتا ہے تو کسی اونٹ کو ذبح کرکے اس کے پیٹ سے پانی کی تھیلی نکال لی جاتی ہے۔ لیکن ماہرینِ حیوانیات کی رائے میں اس کا سبب اونٹ کا غیر معمولی خون ہے جس میں ایک قسم کی البیو من بڑی مقدار میں پائی جاتی ہے۔ جب اونٹ کے عضلات پانی سے محروم ہوجاتے ہیں تو اس البیومن کے باعث خون میں پانی بدستور موجود رہتا ہے اور اس کی گردش میں کوئی خلل واقع نہیں ہوتا۔
اونٹ کی کھال کچھ ایسی ہے کہ وہ بیرونی حرارت سے جلد متاثر نہیں ہوتی۔ تقریباً ۱۰۵ درجے فارن ہائٹ تک اونٹ کو پسینہ نہیں آتا۔ نیز اس کی پانی پینے کی رفتار عام جانوروں سے بہت زیادہ ہے۔ اونٹ دس منٹ میں تیس گیلن پانی پی لیتا ہے جس کی بنا پر اس کے خون کے سرخ خلیہ ۲۴۰ فی صد تک بڑھ جاتے ہیں۔ دوسرے جانوروں میں یہ خلیے ۱۳۰ فیصد سے زیادہ بڑھیں تو ان کے پھٹنے کا اندیشہ پیدا ہوجاتا ہے۔
——