گلدستہ

تین چیزیں
تین چیزیں ہیں جو نجات دلانے والی ہیں:
— خدا کا خوف تنہائی اور مجلس میں۔
— حق بات کہنا خوشی اور غصے میں۔
— میانہ روی خوشحالی اور تنگدستی میں۔
تین چیزیں ہلاک کرنے والی ہیں:
— وہ خواہش نفس جس کی پیروی کی جائے۔
— وہ بخل جس کی اطاعت کی جائے۔
— خود پسندی کی عادت اور یہ سب سے شدید ہے۔
سائرہ طارق۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ بڈگام
حدیثِ رسولﷺ
حضرت انس بن مالک ؓ بیان کرتے ہیں کہ رسول اللہ ﷺ نے فرمایا جو آخرت کی فکر کرے:
— اللہ اس کے دل کو غنی کردیتا ہے۔
— اس کے الجھے ہوئے کاموں کو سلجھا دیتا ہے اور
— اس کے پاس دنیا بھی آتی ہے مگر ناک رگڑتی ہوئی اور جو دنیا کی فکر ہی میں مشغول رہے۔
— اللہ اس پر محتاجی (کا احساس) مسلط کردیتا ہے۔
— اس کے معاملات کو الجھا دیتا ہے اور
— دنیا بھی اس کو اتنی نہیں ملتی جتنی اس کے مقدر میں ہوتی ہے۔
منیرہ فیض۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔ہلدوانی
کام کی باتیں
— محنت کامیابی کا راز ہے۔
— بہادر وہ ہے جو نفس اور غصہ پر قابو رکھے۔
— زندگی سفر ہے اس لیے یہاں مسافر کی طرح رہو۔
— خواہشات پر قابو خوشیوں کی زندگی عطا کرتا ہے۔
تسنیم فاطمہ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔دہلی
اقوالِ رسولﷺ
— جھوٹی زبان سب سے بڑی مجرم ہے۔
— بے نیازی سب سے عمدہ دولت ہے۔
— سچی بات دل میں اتر جاتی ہے۔
— بدعت سے بدتر کوئی چیز نہیں۔
— سب سے اچھا ذکر اللہ کا ذکر ہے۔
وسیم اختر۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔مراد آباد
چالاکی
ملکہ وکٹوریا کی پوتی نے کرسمس کے موقع پر اپنی دادی جان کو خط لکھا کہ اس کو پیسوں کی ضرورت ہے اس لیے کرسمس کے موقع پر کسی تحفے کے بجائے اگر نقد رقم عنایت فرمائی جائے تو بڑا کرم ہوگا۔ ملکہ نے جوابی خط میں اسے کفایت شعاری کے فوائد سے آگاہ کرتے ہوئے لکھا کہ ’’تمہیں نقد رقم نہیں دی جاسکتی، البتہ تحفے بھیج دیے جائیں گے۔‘‘ پوتی نے دادی کی بات مان لی اور اس کا شکریہ ادا کرتے ہوئے لکھا: ’’آپ کی گرانمایہ نصیحتوں کا شکریہ۔ حسبِ ارشاد کرسمس کے موقع پر تحائف ہی ارسال فرمادیجیے، مجھے جتنی رقم درکار تھی وہ میں نے آپ کا خط فروخت کرکے حاصل کرلی ہے۔‘‘ (حکایات اپریل، ۱۹۷۳ء)
نبیلہ کوثر۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔نئی دہلی
بے وقوف لوگ
— وہ لوگ بے وقوف ہیں جو خواہ مخواہ حسد کی آگ میں جلتے رہتے ہیں۔
— وہ لوگ نادان ہیں جو دوسروں پر کیچڑ اچھالنے کے لیے اپنے ہاتھ گندے کرتے ہیں۔
— وہ کم فہم ہیں جو دوسروں کی دنیا بنانے کے لیے اپنی آخرت تباہ کرلیتے ہیں۔
سیما بیگم۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بیدر
بو علی سینا کے اقوال
— نیکوں کی صحبت سے پورا فائدہ نہ ہوگا جب تک آدمی بروں سے بچا نہ رہے۔
— انسان کی بہترین خصلت علم ہے ، دل آزاری سب سے بڑی مصیبت ہے۔
— جو شخص انتقام کے طریقے سوچتا رہے گا، اس کے زخم ہمیشہ تازہ رہیں گے۔
— جب آئے دن تمہاری رائے بدلتی رہتی ہے تو اپنی رائے پر بھروسہ کیوں کرتے ہو۔
— زندگی میں تین چیزیں نہایت سخت ہیں، خوفِ مرگ، شدتِ مرض، ذلتِ قرض
عمارہ فاطمہ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بیدر
حکمت کے موتی
— سچائی کامیابی اور جھوٹ رسوائی کا سبب ہے۔
— مصیبت کی جڑ انسان کی گفتگو ہے۔
— عقلمند بولنے سے پہلے سوچتا ہے اور بے وقوف بولنے کے بعد سوچتا ہے۔
— اگر دوسروں کو خوشی دو گے توتمہیں بھی غم نہیں ملے گا۔
— مضبوط ارادے ہی مضبوط کام کرواتے ہیں۔
— وقت بڑا طاقتور ہے اس لیے اس کی مدد لینے والا بھی طاقتور ہوتا ہے۔
— میٹھی زبان بے شمار دشمنوں سے بچاتی ہے۔
— بہت سے نقصانات آدمی کو اس وجہ سے ہوتے ہیں کیوں کہ وہ لوگوں سے مشورہ نہیں لیتے۔
— موتی اگر کیچڑ میں بھی گر جائے تو قیمتی ہے اور گرد اگر آسمان پر بھی چڑھ جائے تو بے قیمت ہے۔
— جس راہ میں بھٹک جانے کا اندیشہ ہو اس سے رک جانا اچھا کیونکہ قدم کا روک لینا گڑھے میں گرنے سے بہتر ہے۔
نامعلوم (نام نہیں لکھا)۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
اقوالِ زریں
— سب سے افضل وہ ہے جو دل کا نرم اور زبان کا سچا ہو۔
— میٹھی زبان بدترین دشمن کو بھی اپنا دوست بنالیتی ہے۔
— بے کار ہے وہ قوم جس میں اتفاق اور اتحاد نہ ہو۔
— کسی کے اخلاق پر اس وقت تک اعتماد نہ کرو جب تک اس کو غصے کی حالت میں نہ دیکھ لو۔
عشرت پروین ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔آکولہ
حدیث
حضرت ابوہریرہؓ سے روایت ہے کہ نبی ﷺ نے فرمایا: اچھا گمان رکھنااللہ تعالیٰ کے ساتھ بہترین عبادات میں داخل ہے۔ یعنی اللہ تعالیٰ کے ساتھ حسنِ ظن بھی عبادت ہی ہے۔
عبدالرحمن۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔نئی دہلی
لطیفہ
استاد: شاگرد سے آلو بخارہ کسے کہتے ہیں؟
شاگرد: جس آلو کو کھانے سے بخار آجائے اسے آلو بخارا کہتے ہیں۔
رقیہ فاطمہ۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔بیدر