گھریلو نسخے

سردیوں میں انگلیوں کا پھولنا

سردیوں میں پیروں کی انگلیوں کا سرخ ہو کر سوج جانا ایک عام شکایت ہے۔ اس کے لیے دیسی شلجم کے کر انھیں بال لیں، اس کے پانی میں نمک اور سرسوں کا تیل ملا کر پاؤں کو اس میںڈبوئے رکھیں اور ابلے ہوئے شلجم آہستہ آہستہ انگلیوں پر ملیں۔ تھوڑی دیر کے بعد پاؤں خشک کرکے کپڑے میں لپیٹ کر سوجائیں، پاؤں کو ہوا نہ لگنے دیں۔ چند دن ایسا کرنے سے پاؤں بالکل ٹھیک ہوجائیں گے۔ پھٹی ہوئی ایڑیوں کو بھی ابلے شلجم سے ملئے بہت جلد ٹھیک ہوجائیں گی۔

اس کے علاوہ گیہوں کی بھوسی کو پانی میں جوش دے کر اس سے ہاتھوں کو دھوئیے

زکان سے محفوظ رہیے

٭ روزانہ سوتے وقت چھ سات کالی مرچیں پانی کے ساتھ نگل لیجیے اس طرح آپ زکام سے محفوظ رہیں گی۔

٭ نزلہ و زکام ہوجانے پر دو چھوٹے چمچے شہد میں نصف لیموں کا رس شامل کرکے دن میں اسی طرح تین چار پی لیجیے نزل و زکام جاتا رہے گا۔

٭ ایک بڑا چمچہ شہد ایک گلاس پانی میں ملا لیجیے۔ پھر ایک چمچہ ادرک کا رس بھی ملا دیجیے۔ دن میں ۳، ۴ مرتبہ پی لیجیے زکام جاتا رہے گا۔

ہاتھ پاؤں سے زیادہ پسینہ آنا

بعض آدمیوں کے ہاتھ کی ہتھیلی اور پاؤں کے تلووں سے بہت زیادہ پسینہ نکلا کرتا ہے۔ اس کے لیے یہ دوائیں مفید ہیں:

(۱) بیر کے پتے پیس کر ہاتھ پاؤں پر لگائیں

(۲) کیکر کی پتیاں خشک باریک پیس چھان کر ہاتھ کی ہتھیلی اور پاؤں کے تلووں پر ملیں۔

(۳) پھٹکری پانی میں گھول کر اس سے ہاتھ کی ہتھیلی اور پاؤں کے تلووں کو دھوئیں۔

(۴) بینگن کا پانی نکال کر ہاتھ کی ہتھیلیوں اور تلووں پر لگانے سے بھی ان سے پسینہ کا نکلنا بند ہوجاتا ہے۔

آواز کا بیٹھ جانا

کبھی نزلہ و زکام کی وجہ سے اور کبھی زیادہ زور سے چیخنے چلانے یا زیادہ دیر تک تقریر کرنے یا گانے یا خاک دھول یا دھواں سانس کے ساتھ اندر چلے جانے سے آواز بیٹھ جاتی ہے اور کبھی ٹھنڈ لگنے یا سیندور کھانے سے بھی یہ شکایت پیدا ہوجاتی ہے۔

اگر یہ شکایت نزلہ و زکام کی وجہ سے ہو تو اس کا علاج کریں ورنہ حالات کے مطابق نیچے لکھی ہوئی دواؤں سے کوئی دوا استعمال کریں۔

اگر دھوئیںیا گردو غبار یا زور سے چیخنے چلاّنے، تقریر کرنے اور گانے سے آواز بیٹھ جائے تو:

(۱) چراغ کا گل پان میں رکھ کر کھائیں۔ سیندور کھانے سے بیٹھی ہوئی آواز کے لیے یہ خصوصیت سے مفید ہے۔

(۲) خولنجان ایک ماشہ پان میں رکھ کر کھائیں۔

(۳) ادرک میں سوراخ کرکے نمک بھردیں، پھر ادرک سے نکالے ہوئے چورہ سے سوراخ بند کرکے گیلا کپڑا لپیٹیں اور آٹا یا مٹی لگا کر چولہے میں دبا دیں، جب پک جائے تو نکال لیں اور تھوڑی تھوڑی ادرک کاٹ کر کھائیں۔ سردی سے بیٹھی ہوئی آواز کھل جائے گی۔

(۴) تمباکو کا جلا ہوا گل جو چلم میں باقی رہ جاتا ہے، ایک سیر جمع کرکے باریک پیس لیں اور اس کو پانی پانچ سیر میں گھول کر رات کو رکھ چھوڑیں، ایک دو بارہ اچھی طرح ہلاتے بھی رہیں۔ صبح کو صاف پانی نتھار کر ایک کڑاہی میں پکائیں، یہاں تک کے پانی اڑجائے اور گاڑھا لعاب سا رہ جائے اس کو خشک کرکے شیشی میں رکھ چھوڑیں۔ یہ تمباکو کا نمک تیار ہوگیا۔ ایک رتّی یہ نمک پان میں کھانے سے آواز کھل جاتی ہے۔ اس کے علاوہ اس کے کھانے سے پرانی کھانسی بھی دور ہوجاتی ہے۔

(۵) بادام کی گریاں سات اور کالی مرچیں سات دانے دونوں کو تھوڑا پانی ڈال کر چٹنی کی طرح پیس لیں اور ذرا سی چینی ملا کر چاٹ لیں، خشکی کی وجہ سے بیٹھی ہوئی آواز کھل جائے گی۔