موسم گرما کا تحفہ آڑو

آڑوموسم گرما کا خاص پھل ہے۔چپٹے کچے آڑو سے لے کر گول سرخ پکے ہوئے آڑو تک اس موسم میں دستیاب ہیں۔ بڑے آڑو کو شفتالو بھی کہتے ہیں۔ اسے انگریزی میں Peach عربی میں خوخ کہا جاتا ہے۔ یہ پت جھڑ درختوں کے گروہ سے تعلق رکھتا ہے۔ اس کا پھل انتہائی لذیذ، میٹھا اور خوشبودار ہے۔ قدرت نے اس پھل میں شکر اور لحمیات کے علاوہ لوہا اور فاسفورس بھی سمودیا ہے جس سے اس کی افادیت دو چند ہوگئی ہے۔ آڑو کی گٹھلی، اس کے پھولوں اور اس کے پتوں کی بھی خاص اہمیت ہے۔ پھول بطور کرم کش استعمال کیے جاتے ہیں۔ پہلے امراء آڑو کی گٹھلی کا روغن بالوں کی آرائش و زیبائش کے لیے خصوصی طور پر نکلواتے تھے۔

آڑو کا اصل وطن ایران ہے۔ پاکستان میں وادی پشاور آڑو کی کاشت کے لیے بہت موزوں ہے۔ اس کے علاوہ مالا کنڈ، کرم، وزیرستان اور بلوچستان کے پہاڑی علاقوں میں کاشت کیا جاتا ہے۔ مردان اور پشاور کا آڑو ذائقے کے لحاظ سے بہت عمدہ ہے۔ اب مری کی پہاڑیوں اور پنجاب کے کچھ علاقوں میں بھی آڑو کاشت کیا جانے لگا ہے۔ ہمارے ملک ہندوستان کے شمالی علاقوں میں اس کی پیداوار کافی ہے۔

اطباء کہتے ہیں وہ آڑو سب سے اچھا ہے جس کی گٹھلی بآسانی گودے سے علاحدہ ہوجائے۔ مزاج کے اعتبار سے یہ پھل سرد ہے۔ معدے اور جگر کو طاقت دیتا اور پیاس کی شدت دور کرتا ہے۔

ہمارے ایک عزیز کھانے پینے کا ذرا پرہیز نہیں کرتے، البتہ کھانے میں تین آڑو ضرور کھاتے ہیں۔ کہتے ہیں کہ ہائی بلڈ پریشر ہو تو میں دوا کے بجائے آڑو کھالیتا ہوں اور ٹھیک ہوجاتا ہوں۔ ان کے گھر دعوت ہو اور مہمان پرہیز کا عذر کرے، تو کہتے ہیں کھانے سے پورا پورا انصاف کرو، بعد میں دو تین آڑو کھالینا، ٹھیک ہوجاؤگے۔

گرم طبیعت والوں کے لیے آڑو بہترین تحفہ ہے۔ خون کی رگوں میں سختی دور کرکے ہائی بلڈ پریشر کو اعتدال پر لاتا ہے۔ قبض کشا اثرات کی وجہ سے زہریلے فضلات خارج کرتا ہے۔ پیٹ کے چھوٹے بڑے کیڑے مارتا اور آئندہ کے لیے ان کی افزائش کو روکتا ہے۔ اسے کھالینے سے پیاس کی شدت ختم ہوکر سکون محسوس ہوتا ہے۔ یہ گرمی کے بخاروں میں بھی مفید ہے۔ بخار میں میٹھا آڑو کھانے سے طبیعت میں فوری طور پر بشاشت آتی ہے۔ جن لوگوں کو گرمیوں میں بھوک نہ لگتی ہو، پیاس کی وجہ سے براحال ہو، قبض رہتا ہو، چڑچڑا پن بہت بڑھ گیا ہو، ان کے لیے یہ پھل بہت بڑی نعمت ہے۔

ایک بوڑھے سپیرے نے بتایا کہ کچھ لوگوں کو سانپ ہر چودھویں رات کو ڈس لیتا ہے۔ ایسے میں چھٹانک بھر آڑو کے پتے ایک گلاس پانی میں گھوٹ چھان کر پلائیں، تو فائدہ ہوتا ہے۔

آڑو کی گٹھلی کا تیل کان کے درد اور بہرے پن کے لیے مفیدہے۔ اس کاروغن خود نکلوانا چاہیے تاکہ اس میں کسی اور تیل کی آمیزش کا امکان ختم ہوجائے گا۔

جن لوگوں کے معدے میں تیزابیت رہتی ہو، وہ موسم کے اس پھل سے بہت فائدہ اٹھاسکتے ہیں۔ کھانے سے آدھا گھنٹہ پہلے ایک دو آڑو کھانے سے معدے کی تیزابیت اور گرمی دور ہوجائے گی۔ چند روز باقاعدگی سے یہ پھل کھائیے۔ یہ پھوڑے پھنسیوں اور اس نوع کی دوسری بیماریوں میں بہت مفید ہے۔ کچھ لوگ اس کا چھلکا اتار کر کھاتے ہیں۔ اگر چھلکے سمیت کھایا جائے تو زود ہضم اور قبض کشا ہوتا ہے۔

نوجوان لڑکوں کو آڑو ضرور کھانے چاہئیں کیونکہ اس سے جوش خون کے ساتھ ساتھ رطوبتوں کا اخراج بھی درست رہتا ہے۔ جو لوگ دھوپ میں کام کاج کرتے ہوں، انہیں موسم کی شدت سے غذا کی نالی میں سوزش ہوجاتی ہے۔ کھانا پینا دشوار ہوتا ہے۔ اس کیفیت میں آڑوکھانے سے جلد آرام آجاتا ہے۔

گرمی کی آمد پر چھوٹے بچوں کے کانوں کے پیچھے اور سرپر سخت خارش والی پھنسیاں نکل آتی ہیں۔ آڑو کی گٹھلی کا مغز اور اس کے برابر ہرے دھنیے کے پتے دونوں پیس لیجیے اور اس کا لیپ پھنسیوں پر کیجیے۔ چند روز میں آرام آجائے گا۔ اس کے ساتھ ساتھ نیم کے جوشاندے سے ان کا سردھوئیے۔ بواسیر کے لیے پہلے زمانے میں آڑو کی گٹھلی کسی پتھر پرپانی کی مدد سے گھس کر اس میں اتناہی کافور اور چار گنا مکھن ملاکر محفوظ کرلیتے تھے۔ اسے بواسیر کے مسوں پر لگانے سے جلن اور درد سے افاقہ ہوتا ہے اور سات آٹھ ہفتے کے استعمال سے مسے بھی خشک ہوجاتے ہیں۔

بڑھاپے میں اگر معدہ کمزور ہو، تو آڑو نقصان دیتا ہے۔ ایسے میں آڑو کے بعد ادرک کا مربہ اور شہد ملاکر کھانے سے وہ جلدہضم ہوجائے گا۔ دائمی قبض میں آڑو کے مغز کا تیل تین چھوٹے چمچ تک حسب برداشت پیتے ہیں۔ آڑو کھانے سے صالح خون پیدا ہوتا ہے۔ یہ معدے، جگر اور آنتوں کے زہریلے فضلات خارج کرتا ہے۔

آڑو کا جیم بھی بنتا ہے۔ کھٹامیٹھا پکا ہوا پھل خوب اچھی طرح صاف کرکے چاقو سے چھوٹے چھوٹے ٹکڑے کرلیتے ہیں۔ انہیں ہم وزن چینی ڈال کر پکالیا جاتا ہے۔ زیادہ مزیدار بنانے کے لیے اس میں آلو چوں یا خوبانی کی آمیزش کی جاتی ہے۔

درخت پر پکے ہوئے سرخ آڑو لے کر انہیں دو حصوں میں کاٹ لیا اور گٹھلی نکال کر چھلکا اتاردیا جاتا ہے۔ پھر انہیں شیرے میں بھگوکر ڈبوں میں بند کردیتے ہیں۔ یہ غذائیت اور لذت کے اعتبار سے لاجواب ہیں۔ اسی طرح خشک آڑو محفوظ کیا جاتا ہے۔درخت پر پکے ہوئے بہترین پھل چن لیجیے۔ انہیں دھو اور صاف کرکے درمیان سے کاٹ کر گٹھلی نکال دیجیے۔ پھر خاص ٹرے میں پھیلاکر گندھک کے دھویں میں چند گھنٹے رکھیے اور پانچ چھ دن میں سکھاکر محفوظ کرلیجیے۔

پکے ہوئے صاف ستھرے پھل کا چھلکا اتار کر گٹھلی نکال دیجیے اور بھاپ میں نرم کرلیجیے۔ پانچ پونڈ گودے میں اتناہی نارنگی کا رس ملاکر چینی شامل کیجیے، یہ نہایت عمدہ ہوتا ہے۔ زیادہ بنانا ہو، تو پاٹاشیم میٹابائی سلفائیت شامل کرلیتے ہیں تاکہ محفوظ رہے۔ اس میں پانی بھی ملایا جاسکتاہے۔

سخت آڑو کے چوکور ٹکڑے کاٹ کر ہلکی آنچ پر ابالیے اور نرم ہونے پر چینی شامل کیجیے۔ یہ سٹیو سادہ یا کریم کسٹرڈ میں شامل کرکے کھایا جاتا ہے۔

آپ آڑو کے گول گول قتلوں سے کسٹرڈ کی آرائش کرسکتی ہیں۔ خربوزے اور خوبانی کے ٹکڑے باریک کاٹ کر ان میں ایک آڑو ملائیے۔ تھوڑی سی کریم پھینٹ کر ان میں شامل کیجیے۔تازہ پھلوں کی یہ ڈش گھر میں سب کو پسند آئی گی۔ کھانے سے کچھ دیر پہلے پھل کاٹئے تاکہ خراب نہ ہوں۔

گرمی کے موسم میں اسکول جانے والے بچے ماؤں کو بہت تنگ کرتے ہیں۔ ناشتا بھی نہیں کرتے اور گھر آکر بھی کھانا کھانے سے انکار کرتے ہیں۔ ان کے لیے آپ آڑو کی میٹھی ڈش بنائیے۔ بچوں کے پسندیدہ فلیور کا سادہ کسٹرڈ بناکر دو آڑو کے پیالوں میں بھر دیجیے۔ اوپر سے تھوڑی سی جیلی کے ٹکڑے سجاوٹ کے لیے رکھیے۔ بچوں کے آتے ہی انہیں پہلے یہ آڑو کھلائیے۔ آپ حیران ہوں گی کہ انہیں چند روز میں کھل کر بھوک لگے گی اور وہ پیٹ بھر کھانا کھائیں گے۔ (ماخوذ)