نازشِ گیتی فخرِ آدم صلی اللہ علیہ و سلم
ختمِ رسل سرمایۂ عالم صلی اللہ علیہ و سلم
روحِ محبت جانِ عنایت حلم سراپا آیۂ رحمت
پیکرِ شفقت لطفِ مجسم صلی اللہ علیہ و سلم
وجہِ فروغِ بزم ہدیٰ بھی آبروئے گلزارِ صفا بھی
خود ہی سورج خود ہی شبنم صلی اللہ علیہ و سلم
تیری صدا آوازِ زمانہ تیرا نفس بے ساز زمانہ
تجھ سے بلند انسان کا پرچم صلی اللہ علیہ و سلم
تیرے ساتھی پھول کی خوشبو تیرے صحابہ چاند کی کرنیں
اور تو ہے ان سب سے مکرم صلی اللہ علیہ و سلم
گیسو گیسو گلشن گلشن عارض عارض محفل محفل
جلوہ جلوہ عالم عالم صلی اللہ علیہ و سلم
اول و آخر بندہ ہی بندہ اول و آخر آقا ہی آقا
عبدِ مکمل ہادیٔ اعظم صلی اللہ علیہ و سلم
صبحِ ازل سے شامِ ابد تک تیرا چرچا تیرے ہی جلوے
تو ہے محیطِ ہر دو عالم صلی اللہ علیہ و سلم
تجھ پر قرباں میرے اب و جد تجھ پر صدقے مال و فرزند
تیرے قدم سے اپنا دم خم صلی اللہ علیہ و سلم
تیری لگن کے سائے سائے پہنچا ترے دربار تک اخترؔ
روزِ جزا کا اب اُسے کیا غم صلی اللہ علیہ و سلم
