نقطے

رہبر آگے تھا

اور وہ سب اس کے پیچھے تھے۔

’’روشنی کہا ںہے؟‘‘ ایک نے سوال کیا۔

رہبر خاموش تھا۔

لیکن دوسرے نے جواب دیا

’’اسی کی تلاش میں تو ہم جارہے ہیں۔‘‘

’’ابھی کتنی دور جانا ہے؟ کسی نے سوال کیا

’’ابھی تو ہم نے سفر شروع کیا ہے، ابھی سے کیوں منزل کی فکر۔‘‘ کسی دوسرے نے جواب دیا۔

اچانک کہیں اندھیرے سے آواز آئی:’’وہ دیکھو، اس طرف روشنی ہے۔‘‘

انھوں نے اندھیرے میں اپنی آنکھیں پھاڑ کر دیکھا لیکن ان کو کہیں بھی روشنی نظر نہیں آئی، البتہ دور کہیں یہ چند نقطے جلتے بجھتے نظر آئے۔

’’رک جاؤ۔‘‘ کسی نے کہا۔

’’کیوں؟‘‘ بہت سی سوالیہ آوازیں آنے لگیں۔

’’ہمیں وہیں جانا ہے۔‘‘

’’نہیں— ‘‘اچانک ایک زوردار آواز سنائی دی۔ رہبر کے چہرے سے ناراضگی ظاہر ہورہی تھی۔

اس نے کہا:

تم جس کو روشنی سمجھ رہے ہو وہ روشنی نہیں ہے۔ وہ جگنو ہیں۔ یہ دھوکا ہے فریب ہے۔ اگر تم اس طرف جاؤ گے تو راستہ بھٹک جاؤ گے۔ اور تیرگی تمہیں نگل جائے گی … اور …

اتنے میں کسی نے رہبر کو ٹوک دیا۔

’’تم تو صدیوں سے یہی باتیں سناتے آرہے ہو۔‘‘

اچانک رہبر رک گیا۔

نہ جانے کیوں اچانک خاموشی چھاگئی۔ گہری خاموشی۔ پھر اس خاموشی کو توڑ کر کچھ لوگ اس طرف بڑھ گئے جس طرف جگنو چمک رہے تھے۔

پھر رہبر کے لب کھلے۔

تم تیرگی کے زنداں ہو … تم روشنی کو کیا سمجھو گے۔

پھر اس نے کہا:

لوگو… جب تمہیں روشنی مل جائے گی تو تم خود دیکھ لو گے سیدھی راہ پر چلنے کا فائدہ کیا ہے۔ تمہیں اس کا بہت ہی اچھا پھل ملنے والا ہے۔ یعنی کہ …

رہبر اتنا ہی کہہ سکا کہ اطراف سے بہت سی آوازیں آنے لگیں:

’’ٹھیک ہے ٹھیک ہے، ہمیں بھروسہ ہے۔ ہم آپ کے ساتھ چل رہے ہیں۔‘‘

پھر وہ آگے بڑھنے لگے

آگے کانٹے دار جھاڑیاں تھیں۔

وہ سب اپنے لباس سنبھال کر بدن کانٹوں سے بچا کر چل رہے تھے۔

’’یہاں اتنی کانٹوںبھری جھاڑیاں کیوں اگ آئی ہیں۔ ان کو ہم صاف کیوں نہ کردیں۔‘‘ کسی نے پوچھا

’’خاموش!‘‘ کسی نے اس کو ٹوک دیا۔

’’کیوں؟‘‘ اس نے پھر سوال کیا۔

’’ہمارے پاس وقت نہیں ہے۔ جنگل کو صاف کرنا ہمارے بس میں نہیں ہے۔ بلکہ اس سے بچ کر نکلنا ہی ہماراکام ہے۔‘‘

’’کیا تم ٹھیک کہہ رہے ہو۔‘‘ اس نے پوچھا

’یقین نہ ہو تو رہبر سے پوچھ لو۔‘‘

رہبر، جو ان کی گفتگو سن رہا تھا کہنے لگا:

’’آگے بڑھتے رہو۔ سیدھی راہ پر چلنا ایک مشکل مرحلہ ہے۔ اس پر سے گزرنے کے لیے روشنی چاہیے۔ دل میں شکوک کو جگہ نہ دو۔‘‘

’’سن لیا تم نے‘‘ کسی نے اس کے کان میں سرگوشی کی۔

’’ہاں میں نے سن لیا ہے۔‘‘ اور وہ خوف سے کانپ گیا۔

ماحول پہ بسیط سناٹا، اور اندھیرا، لیکن اس سناٹے میں بھی اس کو قدموں کی چاپ سنائی دے رہی تھی۔

چپ ، چپ، چپ، ٹھک، ٹھک، ٹھک شاید کوئی لاٹھی ٹیکتا ہوا آگے بڑھ رہا ہے۔ اس نے سوچا۔

نہیں،نہیں یہاں لاٹھی کیوں، اس کی کیا ضرورت ہے۔ شاید کوئی سمندر میںچپو چلا رہا ہے۔ وہ سوچ رہا تھا۔ یا شاید کوئی اپنے گلے کی مالا سے منکے دھکیل رہا ہے۔ کہیں یہ میرے دل کی دھڑکن نہ ہو۔

یا شاید یہ سوکھے پتوں کی سرسراہٹ ہے۔

شاید کتابوں کے اوراق پھڑپھڑا رہے ہیں۔

یا

شاید یہ ڈھول کی آواز ہو۔ اور یہ آواز بڑھ کر سب کے کان کے پردے پھاڑ دے۔

یا

کہیں یہ زلزلے کی آواز تو نہ ہو۔

یا کہیں لاوا پک رہا ہے۔

یا…

شاید یہ میرا وہم وقیاس ہو

اس کو ایسا محسوس ہورہا تھا جیسے اندھیرا کچھ اور گہرا ہوگیا ہو۔ اچانک اس کو رہبر کی آواز سنائی دی۔

’’دل میں اندھیرے کو جگہ نہ دو، ورنہ تم میں اور اندھیرے میں فرق نہیں رہے گا۔‘‘

وہ چونک پڑا