تین دوست

آں حضرت ﷺ اللہ کے رسول تھے۔ آپؐ فرمایا کرتے تھے کہ مجھے معلم بناکر بھیجا گیا ہے۔ آپﷺ کی سیرت پاک کے مطالعہ میں بہت سے ایسے واقعات ملتے ہیں جن سے معلوم ہوتا ہے کہ حضورﷺ کیسے اچھے معلم تھے۔ آپؐ باتوں ہی باتوں میں سبق آموز اور اصولی باتیں بتادیا کرتے تھے۔

ایک مرتبہ حضورﷺ نے صحابہؓ کو ایک کہانی سنائی۔ آپﷺ نے فرمایا: ایک شخص کے تین دوست تھے۔ جب وہ مرنے لگا تو اس نے اپنے ایک دوست کو بلایا اور پوچھا: ’’میں مررہا ہوں۔ سخت مشکل میں مبتلا ہوں۔ ایسے وقت میں تم میری کیا مدد کرسکتے ہو؟‘‘

اس نے کہا: ’’میں عمر بھر آپ کی خدمت کرتا رہا، لیکن اس وقت میں کچھ نہیں کرسکتا۔ میں بالکل بے بس و مجبور ہوں۔ موت کو کسی طرح نہیں روک سکتا۔‘‘

تب مرنے والے نے دوسرے دوست سے مدد چاہی۔

اس نے جواب دیا:

’’اس کٹھن وقت میں صرف اتنا کرسکتا ہوں کہ مرنے کے بعد آپ کو غسل دوںگا، نیا کفن پہناؤں گا، خوشبو میں بساؤں گا۔ آپ کا جنازہ اٹھاؤں گا۔ کسی اچھی جگہ قبر کھدواؤں گا اور دفن کرنے کے بعد فاتحہ پڑھ کر واپس چلا آؤں گا۔ اس سے آگے میرے بس کی کوئی بات نہیں۔‘‘

اس کے بعد اس آدمی نے اپنے تیسرے دوست سے مدد کی درخواست کی۔

تیسرے دوست نے جواب دیا:

’’آپ فکر نہ کریں۔ مرنے کے بعد بھی میں آپ کا ساتھ دوں گا۔ قبر میں بھی آپ کے ساتھ رہوں گا۔ اور قیامت کے دن جب آپ قبر سے نکلیں گے تو اس وقت بھی آپ کے ہمراہ رہوں گا۔‘‘

کہانی سنا کر حضورؐ نے صحابہؓ سے پوچھا:’’جانتے ہو یہ تینوں کون ہیں؟‘‘

صحابہؓ خاموش رہے۔

آپﷺ نے فرمایا:

’’پہلے کا نام مال، دوسرے کا نام عیال اور تیسرے کا نام اعمال ہے۔‘‘