آنکھوں و نظر کی حفاظت کیجیے کہ آخر دم تک آپ کا ساتھ دیں

٭ صاف ستھرے رہیے، چہرے اور ہاتھوں کو دن میں کم از کم دو بار دھوئیے، گندے ہاتھ کبھی آنکھوں کو نہ لگائیے، مکھیوں وغیرہ کو دور رکھئے، خاص کر بچوں کے چہرے پر مکھیاں نہ بیٹھنے دیں۔ مشترکہ تولیہ صابن اور رومال استعمال نہ کیجیے۔
٭ متوازن غذا کھائیے جس میں کاربوہائیڈریٹ، فیٹ اپروٹین اور وٹامن وضروری معدنیات شامل ہوں،جو دودھ، دہی، مکھن، انڈا، مچھلی، گوشت، دالوں، سبزیوں، پھلوں، خشک میوؤں کی مناسب مقدار سے حاصل ہوسکتے ہیں۔ بازاروں میں دستیاب مرکبات وغیرہ ضروری نہیں ہیں۔
٭ کبھی کبھی ایک آنکھ کو بند کرکے دیکھ لیجیے کہ آیا دونوں آنکھوں کی نظر یکساں / پہلے جیسی ہے یا کچھ فرق ہے، اگر فرق محسوس ہو تو آنکھوں کے ڈاکٹر سے مشورہ کیجیے۔
٭ پڑھائی لکھائی کے دوران کاپی کتاب کو ایک سے ڈیڑھ فٹ کے فاصلے پر رکھئے ۔
٭ ٹی وی سے تقریباً ۹ فٹ کے فاصلے پر بیٹھے۔
٭ کمپیوٹر اسکرین ۲۰ سے ۲۶ انچ کی دوری پہ رکھیے اور کام کے دوران سیدھے بیٹھے۔ کمپیوٹر اسکرین کو آنکھوں کی سطح پر رکھئے، ہر گھنٹہ کام کے بعد تھوڑی دیر آنکھوں کو آرام دیجیے اور اسکرین کے آگے حفاظتی شیشہ لگا کر رکھئے۔
٭ اگر آپ ایسے پیشے سے وابستہ ہیں، جہاں تیز روشنی، ویلڈنگ، بھٹی یا دوسری شعاعوں سے واسطہ پڑتا ہو تو ضرور حفاظتی چشمے، شیلڈ وغیرہ استعمال کیجیے۔
٭ جس کی آنکھیں آئی ہوئی ہوں ایسے آدمی سے مصافحہ کرنے سے پرہیز کیجیے، ملانا ہی پڑے تو ملا کر ہاتھ دھولیجئے۔ جن لوگوں کی آنکھیں آئی ہوں وہ خود دوسروں سے ہاتھ ملانے سے احتراز برتیں، بہتر ہے اپنا عذر بتادیا جائے۔
٭ کم/ مدھم روشنی میں پڑھائی لکھائی نہ کیجیے۔
٭ پڑوسی، دوست وغیرہ کے مشورے پر آنکھ بند کرکے عمل نہ کیجیے ضروری نہیں ان کا مشورہ ٹھیک ہی ہو یا ان کو بھی آپ ہی والا عارضہ رہا ہو۔
٭ دوسروں کی دوائیاں، قطرے استعمال نہ کریں، وہ ان کے لیے فائدہ مند ہو سکتے ہیں مگر ضروری نہیں آپ کے لیے بھی فائدہ مند ہوں الٹا نقصان بھی کرسکتے ہیں۔
٭ کوئی بھی قطرے یا آئی ڈراپ ڈاکٹر کی تجویز کے مطابق اور اتنے ہی عرصے کے لیے استعمال کیجیے۔ اپنے طور پر خرید کر دوائیاں استعمال کرنا خطرناک ہوسکتا ہے یہاں تک کہ نا بینا بھی کرسکتا ہے۔
٭ تیز اوزار مثلاً چا قو، چھری، تیز کھلونے، تیر کمان وغیرہ سے بچوں کو دور رکھئے۔
٭ خطرناک کھیلوںمثلاً گلی ڈنڈا، کانچ کی گولیاں، کھیلنے سے بچوں کو دور رکھئے۔
٭ (ہولی اور دشہرہ میں گلال وغیرہ آنکھوں میں نہ پڑنے دیجیے۔) پٹاخوں وغیرہ سے بچوں کو بھی اور خود بھی دوررہیے /احتیاط کیجیے۔
٭ جہاں ریت، اینٹ وغیرہ کا کام ہورہا ہویا ویلڈنگ ہورہی ہو، ایسی جگہ سے دور رہیے۔
٭ جہاں ہتھوڑے سے پتھر توڑنے، کیل ٹھونکنے وغیرہ کا کام ہورہا ہو وہاں سے لازماً دور رہیے۔
٭ جہاں چونا، سفیدی ہورہی ہو یا Acidاور دوسرے کمیکلس ہوں ایسی جگہ سے خود دور رہیے اور بچوں کو دور رکھئے۔
٭ مباشر(سیدھے) تیز روشنی ، سورج اور لیزر (پنسل نما لال رنگ کی روشنی) کی طرف ہرگز نہ دیکھئے یہ عوامل آنکھ کے پردے ’شبکہ‘ کو محروک کرسکتے ہیں، جس کا علاج ناممکن ہوسکتا ہے اور ہمیشہ کے لیے معذوری کا سبب ہوسکتا ہے۔
٭ آنکھوں میں کچھ گرجانے پر آنکھ کو نہ ملیے اور نہ ہی کسی کو ہاتھ لگانے دیجیے بلکہ آنکھ کے ہسپتال یا ڈاکٹر سے ملئے۔
٭ آنکھ میں چوٹ آنے پر آنکھ پر کسی طرح کا دباؤ نہ ڈالئے اور نہ ہی کھول کر خود دیکھنے کی کوشش کیجیے۔ ہوسکتا ہے ایسا کرنے سے آنکھ کو زیادہ نقصان ہوجائیے ۔ مریض کو سیدھا ہسپتال یا آنکھ کے ڈاکٹرکود کھائیے۔
٭ اگر چونا، سفیدی یا کوئی ایسڈ Acidیا دوسرا کمیائی مادہ آنکھ میں گر جائے تو صاف پانی کی لگاتار دھار سے دھوتے رہیے جب تک آنکھوں کے ہسپتال یا ڈاکٹر تک نہ پہنچ جائیں۔ خیال رہے کہ متاثرہ آنکھ سے بہہ کر پاٹی سالم آنکھ میں نہ گرے یعنی اگر دائیں آنکھ میں چونا وغیرہ گرا ہے تو چہرے کو ایسے رکھیے کہ دائیں آنکھ بائیں کے مقابلے میں نیچے ہو، تا کہ پانی زمین پر گرے نہ کہ بائیں آنکھ جو ٹھیک ہو اسی کی طرف بہے۔ آنکھ کو ہاتھ وغیرہ سے نہ ملیے۔
٭ کاجل استعمال نہ کریں تو بہتر ہے۔
علامات جو آنکھ کی بیماری ظاہر کرتی ہیں
٭ سردرد،سردرد اور الٹی، آنکھ میں درد، لال ہونا، پانی آنا۔
٭ ڈرائیونگ میں- خصوصاً رات کو دقت پیش آنا، دھوپ میں کم نظر آنا۔
٭ بچوں کا- کاپی کتاب چہرے کے پاس رکھ کر پڑھنا لکھنا۔
٭ ٹی وی نزدیک سے دیکھنا، آنکھیں بند کرکے / بھینچ کر یا قریب ہوکر دیکھنے کی کوشش کرنا۔
٭ بچوں کا رنگوں پر دھیان نہ دینا۔
٭ سر کو ٹیڑھا کرکے /گردن مروڑ کر دیکھنے کی کوشش کرنا۔
٭ آنکھوں کا مسلسل ہلتے رہنا۔
٭ بچوں کا نظر کے استعمال کا تقاضا کرنے والی کھیلوں سے دور رہنا ۔
علامات جو بینائی کے لیے نہایت خطرناک ہوسکتی ہیں
٭ آنکھیں لال ہونا، درد ہونا، آنکھوں سے پانی بہنا۔
٭ نظر کی کسی بھی طرح کی شکایت۔
٭ موٹا چشمہ استعمال کرنا (ان لوگوں میں انفصال شبکہ Retinal detachmentہوسکتا ہے ایسے لوگوں کو چھ ماہ میں ایک بار مستند و معتبر ماہرِ امراضِ چشم کو دکھانا چاہیے۔ ایسے افراد کی نظر اچانک جاسکتی ہے۔
٭ آنکھ کی پتلی میں کسی بھی طرح کی سفیدی۔
٭ چیزوں کا دو دو نظر آنا۔ ازدواجیہ
٭ آنکھ / آنکھوں کے آگے تیرتے ہوئے مچھر نما دھبے نظر آنا جو نظر کے ساتھ گھومتے رہتے ہوں ،یہ دھبے اچانک بھی آسکتے ہیں اور کبھی کافی عرصہ سے ہوتے ہیں مگر اچانک زیادہ ہوجاتے ہیں۔
٭ آنکھوں / آنکھ کے آگے شرارے یا چنگاریاں نما روشنی نظر آنا۔
٭ آنکھ کے سامنے پردہ سا چھا جانا۔
٭ محیط ِنظر(Field of Vision) کا کم ہوجانا۔ چیزوں کا صرف مرکز حصہ نظر آنا اور آس پاس کا حصہ نظر نہ آنا۔
٭ آنکھ کا چھوٹا یا معمول سے بڑا ہونا، آنکھ کا ابھار اور بھینگا پن۔
٭ وہ افراد جن کے خاندان میں نابینا افراد ہوں۔
٭ ایسے افراد جن کا سفید موتیہ کا آپریشن ہوا ہو لینز(Lens) لگایا گیا ہو یا نہ لگایا گیا ہو، ٹانکے والا آپریشن ہو یا بغیر ٹانکے کا، یا Phaco emulsification(مشین سے آپریشن ہوا ہو) ایسے لوگوں کو کم از کم سال میں ایک بار ضرور ماہر امراضِ چشم سے معائینہ کروانا چاہیے۔ اور اگر چنگاریاں یا مچھر نما دھبے آنکھ کے سامنے آئیں تو فوراً ہی ماہرِ امراض چشم سے رجوع کرنا چاہیے۔
٭ ایسے افراد جن کو ذیابیطس کی بیماری ہو۔
٭ ایسے افراد جن کو بلڈ پریشر کی بیماری ہو۔
٭ ٹی بی کے مریض ،علاج کروارہے ہوں یا بغیر علاج کے۔
٭ آنکھ میں کسی چیز کا گرنا۔
٭ آنکھ میں چوٹ آنا۔
٭ آنکھ میں چونا، سفیدی، ایسڈ یا کسی کیمکل کا گرجانا۔
٭ کالا موتیہ (ایسے افراد جن کے گھر و خاندان کے کسی فرد کو کالا موتیہ ہو)
اگر گھر کے ٹی وی، فرج یا کمپیوٹر میں ذرا سی خرابی آجائے تو اسے فوراً ٹھیک کروایا جاتا ہے مگر آنکھیں، جن سے ان ساری چیزوں کو استعمال کیا جاتا ہے ان کے سلسلے میں لاپرواہی برتی جاتی ہے۔
بازار میں آنکھ کی نہ تو پکچر ٹیوب نہ مدر بورڈ اور نہ ہی کیمرہ مل سکتا ہے، نہ اس کی وارنٹی یا گارنٹی ہے۔ ایک بار نظر گئی تو واپس نہیں آسکتی۔ آنکھوں پر لگا پیسہ آپ کی جائداد ہے۔
حفظِ ماتقدم کے طور پر بچوں میں سال میں دو دفعہ، اور بڑوں میں ایک دفعہ کم از کم ماہرِ امراضِ چشم سے معائنہ کروانا لازم ہے، اس کے سوا ضرورت پڑنے پر۔