معصوم

ننھا عزیز سر پر ایک غلیظ سا بستہ رکھے تھکے تھکے قدم اٹھائے ہولے ہولے گنگناتا جارہا تھا ؎

تعریف اس خدا کی جس نے جہاں بنایا!

کیسی زمیں بنائی کیا آسماں بنایا

اس نے اچانک قدم روک لیے اور زمین کو بڑی سنجیدگی سے دیکھنے لگا۔ پھر بستے کو دونوں ہاتھوں سے تھام کر اوپر دیکھا … ہلکا نیلا آسمان نظر آیا جس پر دو چار چیلیں منڈلا رہی تھیں۔ اس نے مسکرانے کی کوشش کی مگر مسکراہٹ پر حیرت نے فتح پالی ؎

کیسی زمین بنائی کیا آسمان بنایا!

وہ اپنی انگلی دانتوں میں دبائے کچھ سوچتا ہوا قدم اٹھانے لگا۔ ایک دو بار مویشیوں کے گلوں نے اسے تکلیف دی اور وہ ایک طرف دیوار سے چمٹ کر ہر بیل کو خوف سے گھور گھور کر دیکھنے لگا۔ اچانک اس کی نگاہیں ایک جوان بیل کے مرمر ایسے سفید سموں پر جم گئیں اور اور پھر اس نے اپنے میلے کچیلے پاؤں کی طرف دیکھا جو پرانی چپل میں مردہ روحوں کی طرح پڑے تھے۔ میل سے بھرے ہوئے بے جان اور بدصورت!

اس کے ذرا سے دماغ نے ایک بہت بڑی تجویز سوچی ’’اگر اللہ میاں کہیں ملیں تو میں پہلے انھیں سلام کرکے (کیونکہ ماسٹر جی نے بڑوں کو سلام کرنے کی زبردست تلقین کررکھی تھی) یہ عرض کروں گا کہ اچھے اللہ میاں! انسان پاؤں بڑے خراب ہیں۔ انسان چلتا پھرتا ہے، بھاگتا دوڑتا ہے تو اس کے پاؤں میں کنکر کانٹے چبھ جاتے ہیں، میل جم جاتا ہے اور وہ کئی بار زخمی ہوجاتے ہیں … اگر ہمارے پاؤں بیلوں کے سموں کی طرح ہڈی کے بنے ہوئے ہوں تو کیا ہرج ہے؟‘‘

وہ یہ سوچ ہی رہا تھا کہ سامنے سے اسے گاؤں کا سب سے بڑا رئیس مشکی گھوڑے پر سوار نظر آیا۔ اس کی گرگابی سورج کی شعاعوں میں شیشے کی طرح چمک رہی تھی۔ جب وہ عزیز کے پاس سے گزار تو خود بخود اس کی نگاہیں سوار کے پاؤں پر جم گئیں جو دودھ کی طرح سفید تھے۔ اس نے آسمان کی طرف دیکھا جیسے خدا سے اپنی غلط دعا واپس مانگ رہا ہو۔ ’’اتنے اچھے صاف پاؤں! ان کے مقابلے میں سم کیا شے ہے! مگر میں بھی تو ایک انسان کا بیٹا ہوں۔ میرے پاؤں اتنے غلیظ کیوں ہیں؟‘‘ یہ الٹی بات اس کی سمجھ میں نہ آئی۔

وہ اس سوچ میں غرق آہستہ آہستہ جارہا تھا کہ اچانک اسے راستے میں ابھرے ہوئے ایک پتھر سے ٹھوکر لگی۔ بستہ اچھل کر دور کنکروں پر جاگرا، اور اس کے دائیں پاؤں کے انگوٹھے سے خون جاری ہوگیا۔ اسے پھر ایک ثانیہ کے لیے بیل کے سموں کے فوائد کا خیال آیا مگر درد کی شدت نے اس کے دماغ میں ہل چل مچادی۔ اس نے چیخ مار کر رونا چاہا مگر سامنے اسکول کے برآمدے میں ماسٹر جی کھڑے ہاتھوں میں چاک کا ایک ٹکڑا اچھال رہے تھے۔ اس کی چیخ حلق تک آئی اور تو وہ کڑوی دوا کی طرح آنکھیں بند کرکے پی گیا۔ زخم پر مٹی ڈال کر اٹھا اور بستے کو چھوا، تو اس کا دل دھک سے رہ گیا، بستہ اینٹوں میں جاگرا تھا اور اس کی سلیٹ ٹوٹ گئی تھی۔

وہ ضبط نہ کرسکا اور پورے زور سے رونے لگا۔ ماسٹر جی بڑے رحم دل تھے، دوڑے دوڑے آئے اور ننھے کو تسلی دیتے ہوئے کہا ’’جیجے! اٹھ آج تجھے کچھ نہ کہوں گا، آج کاغذ پر سوال حل کرلینا۔ کل سلیٹ خرید لانا اور ہاں اب لوہے کی سلیٹ خریدنا جیسے اصغر کی ہے۔‘‘

’’اصغر کی؟‘‘ عزیز نے سوچا ’’مگر اصغر کا باپ تو پٹواری ہے اور میرا باپ پٹواری اور جنگل کے داروغہ کی گائے بکریوں کے لیے چارہ کاٹنے والا ملازم! لوہے کی سلیٹ پر تو بڑے پیسے خرچ ہوں گے۔ اب کیا ہوگا؟‘‘

اس نے بستہ سر پر اٹھالیا۔ غیر ارادی طور پر اس کی انگلیاں بستے کے اندر کھڑ کھڑاتے ہوئے سلیٹ کے ٹکڑوںکو ٹٹولنے لگیں۔ جب وہ لڑکوں کے جمگھٹ میں داخل ہوا جو اس کی چیخیں سن کر اسکول کے احاطے سے باہر اکٹھے ہوگئے تھے، تو اس کا چہرہ فخر سے لال ہوگیا۔ ماسٹر جی اس کا ہاتھ تھامے ہوئے تھے اور لڑکے بھی اس کی طرف ہمدردانہ نگاہوں سے دیکھ رہے تھے کیونکہ ماسٹر جی نے اس سے ہمدردی کی تھی۔

چٹائی پر بیٹھ کر اس نے بستے سے سلیٹ کے ٹکڑے یوں نکالے جیسے اسے سینے سے دل کے ٹکڑے نکال رہا ہے۔ ایک بڑا ٹکڑا اپنے پاس رکھ لیا اور باقی ایک جھاڑی میں پھینک آیا۔ ماسٹر جی سوال لکھانے لگے، تو اس نے اپنی سلیٹ کے ٹکڑے کی طرف دیکھا جس کے کنارے چاقو کی دھار کی طرح تیز تھے، پھر اصغر کی سلیٹ کی طرف دیکھا … وہ نئی سلیٹ تھی جس کے ساتھ ایک مٹھی بھر اسفنج لٹک رہا تھا۔ اس نے نفرت سے اپنی ننھی سی ناک چڑھا کر اپنی سلیٹ پر زور سے تھوکا اور ہتھیلی سے مل کر سوال حل کرنے لگا۔

چھٹی کے بعد وہ گھر واپس آرہا تھاکہ راستہ میں اسے اپنا باپ مل گیا جو پٹواری کی گائے کے لیے چارہ کاٹ کر لارہا تھا۔ عزیز کے رونگٹے کھڑے ہوگئے اور پھر ہر رونگٹے کی جڑ سے پسینہ پھوٹ نکلا، سلیٹ کے ٹکڑے کے تیز کنارے اس کے دماغ کو چیرنے لگے۔

باپ نے پوچھا: ’’بیٹاچھٹی ہوگئی؟‘‘

’’ہاں ابا!‘‘ ابا کہتے وقت اس کا حلق گھٹ گیا۔ لیکن کھانسی کا بہانہ کرلیا۔ اس غیر متوقع کامیابی پرعزیز جی ہی جی میں خوش ہوا۔

’’گھر جاکر سلیٹ پر خوب سوال نکالنا۔‘‘

’’سلیٹ تو ٹوٹ گئی ہے۔‘‘ اس نے یہ جواب دینا چاہا لیکن اس کی نظر باپ کے بھاری اور کھردرے ہاتھ پر پڑگئی جو اس کے گال پر پڑتا تو اسے دن کے وقت بھی نیلے پیلے تارے نظر آنے لگتے۔ اس لیے وہ خاموش رہا۔

اس کے باپ نے پیچھے مڑتے ہوئے کہا’’سنا؟‘‘

’’ہاں۔‘‘

اس کا باپ پٹواری کے گھر کی طرف چلا گیا اور وہ اپنے گھر پہنچا۔ ماں کو دیکھ کر اس کا جی بھر آیا، آنسو امڈ آئے اور وہ زاروقطار رونے لگا۔

’’کیوں کیا ہوا، میرے بچے، تیرے دشمن روئیں، تو کبھی نہ روئے، میرے بچے کیا بات ہے؟‘‘

یہ کہتے ہوئے ماں بڑی محبت سے اس کے سر اور گالوں پر ہاتھ پھیرنے لگی۔

’’ماں! میری سلیٹ ٹوٹ گئی۔‘‘

اس کی ماں دھم سے دیوار سے پیٹھ لگا کر بیٹھ گئی جیسے اس کا نالائق بیٹا عمر بھر کی کمائی دریا میں غرق کر آیا ہے۔

عزیز نے روتے ہوئے اپنی باچھوں کو پوری قوت سے ٹھوڑی کی طرف کھینچتے ہوئے کہا ’’اماں، ابا کو نہ بتانا۔‘‘

ماں نے اپنے کنگن کو مضطربانہ انداز میں اپنی کلائی میں گھماتے ہوئے پوچھا: ’’تو پھر کیا سر پر نکالے گا سوال؟‘‘

عزیز سوچنے لگا کہ اگر سر پر سوال نکالے جاسکتے، تو وہ روتا ہی کیوں؟ اس کی ماں کتنی بھولی ہے! آخر ان پڑھ ہے نا! پڑھی لکھی ہوتی تو اسے معلوم ہوتا کہ سوال سر پر نہیں صرف سلیٹ پر نکالے جاسکتے ہیں۔

اس دن نہ اس نے ماں سے گڑ مانگا، نہ جوار کے ہلکے پھلکے مرنڈے اور نہ کبڈی کھیلی نہ آنکھ مچولی۔ شام کو اس کے ہمجولی اس کے پاس اکٹھے ہوئے اور اسے مجبور کرنے لگے کہ باہر چلو۔ اس وقت ایک سیانا لڑکا مجمع چیرتے ہوئے آیا اور بولا: ’’ارے یار جیجیکو مت چھیڑو، اس کی سلیٹ ٹوٹ گئی ہے۔‘‘

عزیز کے دل پر جیسے کسی نے من بھرکا ہتھوڑا جمادیا، کانپ کر اٹھا کہ کہیں باپ تو نہیں آگیا لیکن بیل چارے کے انتظار میں کان کھڑے کیے دروازے کی طرف دیکھ رہے تھے اور ماں چولہے کے پاس بیٹھی ٹین کے پترے سے ساگ کتر رہی تھی۔

اس شام وہ چارپائی پر پڑا رہا اور کچھوے خرگوش کی کہانی پڑھتا رہا۔ اسے کئی بار خرگوش پر غصہ آیا کتنا غافل تھا خرگوش! ٹھیک اس طرح جیسے … جیسے ۔ اسے کوئی مثال نہ مل سکی۔ اچانک اس کی اداس آنکھیں چمک اٹھیں : ’’جیسے میں! اور پھر اسے اپنے آپ پر اتنا غصہ آیا کہ جی میں آئی، ابھی اپنے آپ کو قبر میں دفن کردے اور اپنی موت پر ایک آنسو تک نہ بہائے اور پھر خوشی خوشی اسکول … اس کا دماغ گھومنے لگا، جتنا خیالات کا سلسلہ بڑھتا جاتا اس کی وحشت میں اضافہ ہوتا جاتا۔ جب اندھیرا بڑھنے لگا اور اس کی ماں پکاری ’’جیجے! ادھر آ، روٹی ٹھنڈی ہورہی ہے۔‘‘

بے اختیار اس کے منہ سے یہ الفاظ نکل گئے۔ ’’ماں میری سلیٹ جو ٹوٹ گئی۔‘‘

’’کب؟‘‘ مگر یہ ماں کی آواز نہ تھی۔

اس نے سامنے دیکھا، اس کا باپ بڑی بڑی آنکھیں نکالے اس کی طرف بڑھا آرہا تھا، دوبارہ سوال ہوا:

’’کب توڑی؟‘‘

اس نے اپنے آپ کو قبر میں دفن کرنے کی تجویز پر پھر سے غور کرنا چاہا مگر باپ کے ایک ہی تھپڑ نے اس کا سلسلہ خیالات بری طرح منتشر کردیا اور وہ اتنا رویا … اتنا رویا کہ آخر اسے رونے میں لطف آنے لگا۔ وہ اپنا رونا بند نہیں کرنا چاہتاتھا کیوں کہ اس طرح ماں کی تسلیوں کے رک جانے کا اندیشہ تھا۔

’’چپ کرتا ہے لگاؤں ایک اور؟‘‘ … اور اس کی آواز یوں رک گئی جیسے ریڈیو سے کسی ’’میم‘‘ کا گانا سنتے سنتے تنگ آکر لوگ بٹن گھما دیتے ہیں۔

’’سلیٹ بھی توڑ آیا اور ریں ریں بھی کیے جاتا ہے … اندھا … اندھے تو سامنے دیکھ کر کیوں نہیں چلتا؟ … ہیں … یہ ہمیشہ تیری نظر آسمانوں پر کیوں رہتی ہے؟ جیسے اللہ میاں سے باتیں ہورہی ہیں … اندھا مجذوب کہیں کا !‘‘

’’مجذوب! … کتنی بڑی گالی دی ہے ابا نے … ابا کی جگہ کوئی اور ہوتا، تو میں سے اٹھارہ بار مجذوب کہہ ڈالتا۔‘‘ اس نے تلخی سے سوچا۔

جب اس کا باپ اٹھ کر چوپال کو چلا گیا، تو اس نے نہایت راز دارانہ لہجے میں پوچھا: ’’ماں! مجذوب کسے کہتے ہیں؟‘‘

’’جسے اللہ میاں کے سوا کسی کا خیال نہ ہو … یعنی اللہ میاں کا دوست۔‘‘

عزیز سوچنے لگا ’’کیا اللہ میاں کا دوست ہونا بھی بری بات ہے؟‘‘

وہ صبح اٹھا، تو باپ اس کے سرہانے ہی کھڑا تھا، کہنے لگا ’’اٹھتا ہے کہ جماؤں ایک؟ … بے فکرا… لے یہ چونی، تیری خاطر دس آدمیوں کی ڈاڑھیوں کو ہاتھ لگانا پڑا، ابھی قصبہ سے جاکر سلیٹ خرید لا، اسکول کے وقت آجائیو! سمجھے؟‘‘

عزیز نے چارپائی سے اٹھ کر زمین پر قدم دھرے تو اسے یوں محسوس ہوا جیسے اس کا دل پسلیوں تلے ناچ رہا ہے اور اس کی آواز کے ساتھ اس کے ہونٹ بھی کانپ رہے ہیں۔ آنکھیں آپ ہی آپ جھپکی جارہی ہیں۔ نتھنے پھڑک رہے ہیں اور رگ رگ دھڑک رہی ہے۔ وہ چونی لے کر دوڑا ہی تھا کہ اسے باپ کی آواز سنائی دی ’’اے مجذوب! جوتا تو پہنتا جا، تیرا تو سر پھر گیا ہے۔‘‘

اس نے مڑنے سے پہلے اپنے سر پر ہاتھ پھیرا، اس کا خیال تھا کہ اس کا چہرہ پیٹھ کی طرف ہوگیا ہے … باپ کے تھپڑ کی وجہ سے … آخر سر پھرنے کا اور کیا مطلب ہے؟ جب اسے تسلی ہوگئی کہ وہ اپنی پرانی حالت پر قائم ہے تو اسے تعجب ہونے لگا کہ اس کا باپ اتنا جھوٹ کیوں بولتا ہے۔

وہ جوتا پہن کر بھاگا۔ قصبہ وہاں سے ایک میل دور تھا۔ چونی اس کی قمیص تلے پہنی ہوئی سیاہ صوف کی واسکٹ کی جیب میں تھی جسے اس نے مضبوطی سے ہاتھ میں دبا رکھا تھا۔ ایک دو بار اس نے چونی کے گول گول کونوں کو ٹٹولا، چونی اس کی جیب میں موجود تھی۔ ادھر نئی سلیٹ قصبے کی ایک دکان میں اس کی منتظر تھی۔ ایک جگہ وہ قدرے سستانے کے لیے بیٹھ گیا۔

اچانک سامنے جھاڑیوں سے اصغر نکلا، اس کے ہاتھ میں نئی سلیٹ تھی جس کے ساتھ مٹھی بھر اسفنج لٹک رہا تھا۔ اصغر نے اپنی سلیٹ کو فخریہ انداز میں ہوا میں گھمایا۔ عزیز نے محسوس کیا کہ اس کے ہاتھ میں بھی سلیٹ ہے جو ٹین کی طرح بجتی ہے اور جس کے ساتھ ماسٹر جی کی ناک جتنا موٹا اسفنج لٹک رہا ہے۔ اصغر کی آنکھیں جھک گئیں اور وہ پلٹ کر پھر جھاڑی میں گم ہوگیا ’’کتنا پیارا خیال … کیسا سندر سپنا۔‘‘ وہ کھل کھلا کر ہنس پڑا اور پھر دوڑنا شروع کردیا۔ قصبے کے تنگ و تاریک بازار کی دکانیں کھل چکی تھیں۔ وہ سیلٹوں کی دکان کو خوب پہچانتا تھا۔

دکاندار ایک موٹا سا سیٹھ تھا جس نے اپنی ڈھیلی ڈھالی توند اپنے گھنٹوں پر پھیلا رکھی تھی۔ وہ صرف ایک دھوتی باندھے ہوئے تھا۔ عزیز ہانپتا کانپتا اس کے پاس گیا۔

’’سلیٹیں ہیں؟‘‘ یہ سوال اس نے اس انداز سے پوچھا گویا وہ ساری دکان خریدنے آیا ہے۔

دکاندار نے اپنی ناف پر سے بھنبھناتی مکھیاں اڑاتے ہوئے جواب دیا ’’ہاں‘‘

’’دکھاؤ‘‘

دکاندار نے اپنے بازو زمین پرپٹک کر اٹھنے کی کوشش کی اور بہت دیر تک اسی حالت میں کانپتا رہا۔

عزیز پکارا ’’لالہ جی‘‘

’’ہاں بھائی ہاں‘‘ ۔ دکاندار کھڑا ہوا اور عزیز کے سامنے دس پندرہ سلیٹیں رکھ دیں۔

’’لوہے کی ہیں؟‘‘

’’سب لوہے کی ہیں۔‘‘

’’دام؟‘‘

’’تین آنے !‘‘

ایک آنہ بچ گیا، تو عزیز کے گال تمتمانے لگے۔اس کی ننھی سی ناک، اس کے کھلے سفید ماتھے پر اور اس کے بھرے سے نچلے ہونٹ کے تلے پسینہ پھوٹ آیا۔ اسے محسوس ہوا کہ جیسے وہ ابھی یہاں سے دکان سمیت ہوا میں اڑ جائے گا۔

’’اسفنج ہیں؟‘‘

’’ہاں۔‘‘

’’سب سے بڑے اسفنج کے دام؟‘‘

’’چارپیسے۔‘‘

عزیز خوشی سے ناچنا چاہتا تھا، ایک بار تو اس کے جی میں آیا کہ دکاندار سے لپٹ کر گائے ؎

تعریف اس خدا کی جس نے جہاں بنایا

لیکن اس کی توند دیکھ کر اس کی نظر اپنے پیٹ پر جاپڑی جو ریڑھ کی ہڈی سے چمٹ کر رہ گیا تھا۔ ایک لمحہ کے لیے وہ مسکرانا بھول گیا۔ آخر بولا ’’تو یہ سلیٹ اور ایک بڑا اسفنج۔‘‘

دونوں چیزیں اپنے قریب کھسکا کر اس نے قمیص اٹھائی اور واسکٹ کی جیب میں ہاتھ ڈالا، اس کی دو انگلیاں جیب سے باہر نکل گئیں … چونی رستے میں گرگئی تھی۔